Шавкат Мирзиёев: «​Бизни халқ синаяпти, жуда қаттиқ синаяпти​»​

Ўзбекистон Республикаси Президенти Шавкат Мирзиёев Улуғнор туманида давом этаётган видеоселектор йиғилишида ишсизлик ва давлат раҳбарини қийнаётган ташвиш ҳақида гапириб ўтди. 

«​Бизни халқ синаяпти, жуда қаттиқ синаяпти. Қачонгача етиб борар экан, қайси марра, қачон булар эски тос, эски ҳаммом бўлишига ўтади, деган халқимизда ҳали қўрқув борлиги - ҳақиқат.

Мени ҳеч ким алдай олмайди, сизларни минг мақтаганингиз, баландпарвоз гап айтганингиз билан, мен ишонмайман. Мен пастда юрган одамман. Шунинг учун биринчи қадам қўяётганимиз - одамларни ишонтириш, адолатли меҳнат қилиш. Бу жуда катта, юксак ишонч. Бунга муносиб бўла оламизми - бу менинг энг катта ташвишим»​, дея таъкидлаган Шавкат Мирзиёев.

Kun.uz мухбирининг хабар қилишча, давлат раҳбари йиғилиш иштирокчиларига қарата ана шу масъулиятни англаган ҳолда, «ташвишни бирга ҳазм қилиш»ни сўрамоқда.

«Шунда, мана шундай, улуғ айём кунларда халқимиз озгина биздан рози бўлади. Халқимизни қийнаётган нарса - иш жойи йўқ, эртанги кунига ишончи йўқ. Мен маъруза қилишга келганим йўқ. Мен сизларнинг юзингизга қараб, ҳақиқий аҳволни билиш учун келдим. Мана шуни унутмайлик. Бир нарсани билиб олайлик: халқни бундан кейин алдаб бўлмайди», дейди Президент.

Шавкат Мирзиёев хорижда ишлаётган меҳнат муҳожирлари ҳақида шундай тўхталиб ўтди:

«Улар бекорга четда юргани йўқ. Уларга иш жойини ташкил қилиб беролмаганимиз учун четларда юрибди. Ҳамма бало ҳам шундан келади», дея ишсизлик масаласига мурожаат қилган давлат раҳбари.