Наманганда бешта собиқ масжид биносидан бошқа мақсадда фойдаланиш таклиф этилмоқда

Наманган вилоятида ижарага беришга мўлжалланган фойдаланилмай бўш турган нотурар жойлар қаторида бешта собиқ масжид биноси ҳам кўрсатилган. Бу ҳақда Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси хабар бермоқда. 

Маълум қилинишича, 2018 йил 17 май кунги ҳолат бўйича Наманган вилояти, Косонсой туманида жойлашган бешта, жумладан, “Ободон”, “Озод”, “Навбаҳор-1”, “Соҳибкор” ва “Узунқишлоқ” маҳалла фуқаролар йиғинларида жойлашган собиқ масжид биноси деб кўрсатилган нотурар жой объектларидан бошқа мақсадларда фойдаланиш таклиф этилмоқда. 

Косонсой туман ҳокимлиги балансида қайд этилган собиқ масжид биноларидан ишлаб чиқариш, жисмоний тарбия ва спорт тўгараги, савдо дўкони ва хизмат кўрсатиш шохобчаси сифатида фойдаланиш таклиф этилган.

Қўмита хабарида кўрсатилган масжидларнинг ҳозирги фаолияти ёхуд қисман фойдаланишга топширилаётган бинолар ҳақида тўлиқ маълумот йўқ.