“Ўзсаноатқурилишбанк” Annexure Financial Solutions билан 100 млн долларлик ҳамкорлик меморандумини имзолади

АТБ “Ўзсаноатқурилишбанк” ва Annexure Financial Solutions консалтинг компанияси тўғридан-тўғри хорижий инвестицияларни ва хорижий капитални жалб қилиш, инвесторлар ўртасида Ўзбекистон Республикасида амалга оширилаётган инвестицион лойиҳаларни илгари суриш бўйича ҳамкорлик қилиш юзасидан Меморандум имзолади.

Ҳамкорлик манфаатдор стратегик инвесторларни топиш ва умумий қиймати 100 миллион АҚШ долларигача бўлган хорижий сармояларни жалб қилишга имкон беради. Бу эса ўз навбатида тадбиркорлик субъектларининг тўғридан-тўғри хорижий инвестицияларни жалб қилишга бўлган қизиқишини ошишига туртки бўлади.

Annexure Financial Solutions компанияси Тошкент ва дунёнинг энг йирик бизнес мегаполисларидан бири бўлган Шанхайда (Хитой) бизнес ва инвестиция форумлари ўтказиб келмоқда.

Annexure Financial Solutions консалтинг компаниясининг Бош офиси Гонконгда жойлашган, Шанхай ва Тошкент шаҳарларида ваколатхоналарига эга. Компания дунё миқёсида эътироф этилган инвестицион компанияларга ҳамкорлар, инвесторлар ва мижозлар билан алоқа ўрнатиш, кўришиш ва алоқаларни мустаҳкамлашга кўмаклашади.

Жорий йилнинг бошида Тошкент шаҳрида ваколатхонасини очган компания кичик бизнес субъектлари, давлат идораларига стратегик консалтинг, корпоратив консалтинг ва қимматли қоғозлар бозорини таҳлил этиш бўйича хизматларини таклиф қилиб келмоқда.

Реклама ҳуқуқи асосида