Порошенко Трамп билан музокара ўтказиш учун пул тўлагани маълум қилинди 

Дональд Трампнинг шахсий адвокати Майкл Коэн Украина президенти Пётр Порошенкодан Трамп билан биринчи учрашувида у билан музокаралар ўтказишни уюштириш учун камида 400 минг долларлик махфий тўлов олган. Бу ҳақда вазиятдан хабардор бўлган Киевдаги манбаларга иқтибос келтирган ҳолда “Би-би-си” телерадиокомпанияси маълум қилди.  

Телерадиокомпания манбаларининг таъкидлашича, тўлов воситачилар томондан ташкиллаштирилган. “Би-би-си”нинг Украина разведкасининг юқори лавозимдаги ходимига иқтибос келтирган ҳолда маълум қилишича, Порошенко учун Трамп билан учрашувда бор-йўғи фотокамералар олдида қисқагина фотосессияга эришилгани сабабли Коэнни жалб қилишга қарор қилинган. Порошенкога эса музокаралар керак бўлган.   

Бу мақсада Коэн танланган. Манбанинг маълум қилишича, Коэн билан музокараларни ташкиллаштириш Порошенконинг собиқ ёрдамчисига юкланган. У ўз навбатида бир украиналик депутатни ишга солган. Депутат эса Chabad of Port Washington яҳудий хайрия ташкилотидаги алоқаларидан фойдаланган. 

“Би-би-си”нинг Киевдаги яна бир манбаси ҳам юқоридаги маълумотларни берган, бироқ у Коэнга тўланган умумий сумма 600 минг долларни ташкил қилганини маълум қилган.

Трамп бундан хабари бор-йўқлиги номаълум, деб қўшимча қилган “Би-би-си”.

Коэннинг ўзи эса бу хабарларни рад этган. Порошенко матбуот хизмати ҳам бу хабарга изоҳ беришдан бош тортган.

Порошенконинг Трамп президент бўлгандан кейин АҚШга илк ташрифи 2017 йил июнда бўлиб ўтган. Ўшанда уларнинг учрашуви ярим соат давом этган.