Сингапурда Трамп ва Ким Чен Ин учрашиши мумкин бўлган меҳмонхона тўлиқ эгаллаб қўйилди

АҚШ президенти Дональд Трамп ва Шимолий Корея етакчиси Ким Чен Ин 12 июнда учрашиши мумкин бўлган Сингапурдаги Shangri-La меҳмонхонаси 10 июндан 15 июнгача хоналарни бронлашни тўлиқ тўхтатди. Бу ҳақда меҳмонхона ходимлари маълум қилишди. 

Ушбу меҳмонхонада 1-3 июнь кунлари Осиё-Тинч океани минтақасидаги хавфсизлик масалалари бўйича халқаро анжуман Shangri-La Dialogue бўлиб ўтади.

Shangri-La меҳмонхонаси Орчард савдо кўчаси яқинида жойлашган. Меҳмонхонада музокаралар ва хоналарга олиб борувчи алоҳида кириш бор. Музокаралар вақтида бу кириш жойи чодир билан ёпилади ва ундан фақат тадбирлар иштирокчиларигина фойдалана оладилар. The Straits Times нашрининг ёзишича, Ким Чен Ин Сингапурда бир кун бўлмоқчи. Маълум қилинишича, у музокаралар куни келиб, улар якунлангандан кейин Пхеньянга қайтиб кетишни режалаштирган.