Лукашенко илк бор КХДРга ташриф буюрди

Беларус раҳбари Александр Лукашенко чоршанба куни, 25 мартда Шимолий Кореяга келди. Бу унинг КХДРга биринчи ташрифидир, деб хабар қилди Reuters агентлиги. Лукашенко ташрифининг асосий мақсади — Минск ва Пхенян ўртасида дўстлик ва ҳамкорлик тўғрисидаги шартномани имзолаш, деб маълум қилди мамлакат ташқи ишлар вазири Максим Риженков Беларус давлат ОАВда. Бундан ташқари, Минск ва Пхенян икки давлат ўртасидаги ҳамкорликнинг ҳуқуқий асосларини санкциялар ва халқаро яккаланиш шароитида кенгайтириш ҳамда мустаҳкамлашга қаратилган тўққизта соҳавий келишувни ҳам тузиши кутилмоқда.

2025 йил сентябрида Шимолий Кореянинг яккаҳоким ҳукмдори Ким Чен Ин ва Лукашенко Пекинда Иккинчи жаҳон уруши тугаганининг 80 йиллигига бағишланган ҳарбий парад чоғида учрашган эди. Ўшанда Ким Лукашенкони меҳмонга таклиф қилган.

Reuters агентлиги таъкидлашича, КХДР ва Беларус Россиянинг Украинага қарши урушида Москвага сезиларли даражада ёрдам бермоқда. Пхенян Россияга ўқ-дорилар ва шимолий кореялик ҳарбий хизматчиларни юбормоқда. Минск эса, ўз навбатида, 2022 йил феврал ойида Россияга Беларус ҳудудидан Украинага кенг кўламли босқин учун плацдарм сифатида фойдаланиш имконини берган ва у ерга Россиянинг тактик ядровий қуролларини жойлаштиришга розилик билдирган.

Александр Лукашенко ва Ким Чен Ин учрашуви фақат рамзий хусусиятга эга бўлиб, у уларнинг давлатлари чуқур халқаро яккаланишда эмаслигини кўрсатишга қаратилган, деди Reuters агентлигига муҳожирликда яшаётган беларуслик мухолифатчи Валерий Цепкало.

АҚШ президенти Доналд Трамп Беларус ва КХДР раҳбарлари билан алоқаларни тиклашга уринмоқда. У ўзининг биринчи президентлик муддатида Ким Чен Ин билан уч марта учрашган, ўтган йили эса Оқ уй Лукашенко билан тўғридан тўғри алоқаларни қайта тиклаган.

Шу фонда АҚШ Беларусга қарши санкцияларни сиёсий маҳбуслар, жумладан мухолифатнинг бир нечта етакчилари — Мария Колесникова, Виктор Бабарико, Сергей Тихановский озод қилиниши эвазига юмшатишни бошлади.