Колумбия НАТОнинг глобал ҳамкорига айланади

Колумбия президенти Хуан Мануэль Сантоснинг эълон қилишича, НАТО билан ҳамкорлик бўйича келишувга эришилган. Бу ҳақда РИА «Новости» хабар берди.

«Яна бир катта янгилик. Келаси ҳафтада биз Колумбиянинг НАТОга глобал ҳамкор сифатида киришига расмий тус берамиз», - дея айтиб ўтди у.

Унинг сўзларига кўра, Колумбия Лотин Америкасида шундай ўзига хос имтиёзга эга бўладиган ягона давлатга айланади.

2013 йилда Колумбия ва НАТО махфий маълумотни алмашиш бўйича битим имзолаган. Таъкидланишича, Колумбия «НАТОнинг бир қисми» бўлишни хоҳламайди, бироқ «ташкилотдан ўрганишни, гиёҳванд моддалар ҳамда терроризмга қарши курашда тажриба алмашишни» истайди. Келишув Брюсселда имзоланганди.

Эслатиб ўтамиз, аввалроқ НАТО Малайзия лайнери ҳалокати бўйича Россияга қўйилган айбловларни қўллаб-қувватлаганди.