Путин Цзиньпиндан жаҳон етакчилари орасида биринчи бўлиб Хитой дўстлик орденини олди

Россия президенти Владимир Путин ХХР раиси Си Цзиньпиндан Хитойнинг олий давлат мукофоти - Хитой Халқ Республикаси Дўстлик орденини олган давлат раҳбарларидан биринчисига айланди. 

Бу орден қонун билан асосий давлат мукофоти сифатида тасдиқланган, у 2016 йилнинг 1 январь куни кучга кирган. Қонун бандларига мувофиқ, у билан хорижий фуқаролар Хитой давлат қурилиши ва модернизациясига қўшган алоҳида ҳиссаси, шунингдек, мамлакатнинг хорижий давлатлар билан алоқалари ҳамда ҳамкорлигини ривожлантириш ва тинчликни ушлаб туришга қаратилган саъй-ҳаракатлари учун тақдирланади.

Си Цзиньпиннинг таъкидлашича, Путин Хитойга 2000 йилдан бери 19 марта ташриф билан келган бўлиб, бу жаҳон давлатлари раҳбарлари орасидаги энг юқори кўрсаткичлардан бири саналади. У Россия етакчисини «Хитойда энг таниқли ва ҳурмат қилинадиган шахс», деб атаган.

Эслатиб ўтамиз, аввалроқ Цзиньпин Назарбоевга Хитой Қозоғистон билан бир йўлдан кетишга тайёрлигини айтганди.