Трамп Канада бош вазири “қимматга тушадиган хато” қилганини айтди

АҚШ президенти Дональд Трамп ABC телеканалига берган интервьюсида Канадада бўлиб ўтган “Катта еттилик” саммити якунларига изоҳ берди.

Трамп бошқа масалалар орасида Вашингтоннинг иқтисодий сиёсатини танқид қилган Канада бош вазири Жастин Трюдонинг сўзлари ҳақида салбий фикр билдирди.

Трампнинг айтишича, Трюдо “нафсониятга тегувчи сўзлар” айтган ва “унга қимматга тушадиган” хатога йўл қўйган.

“У буни қилиши керак эмасди. Бу унга қимматга тушадиган хато бўлди”, деб айтган Трамп.

Трампнинг айтишича, “еттилик”ка кирувчи давлатлар етакчилари саммитнинг охирги куни Трюдо тўсатдан бундай сўзларни айтмагунигача “ўзларини бахтиёр сезаётгандилар”. Бироқ шунга қарамай, Трамп Трюдога яхши муносабатда эканлигини айтган.

Трампнинг бош иқтисодий маслаҳатчиси Ларри Кудлоу Трюдо томонидан АҚШ божларининг танқид қилинишини “орқадан пичоқ уриш” деб атаган.