Испанияга Ўрта ер денгизида бир неча кундан бери сарсон муҳожирлар етиб келди

Испанияга Ўрта ер денгизида бир неча кунлик сарсон-саргардонликдан кейин Aquarius қутқарув кемасидаги илк муҳожирлар етиб келди. 17 июнь эрталаб Италиянинг Dattilo кемаси муҳожирларнинг биринчи гуруҳини Валенсия портига етказди. Aquarius’нинг ўзи ва яна битта италян кемаси Orione’даги қолган муҳожирлар кейинроқ келиб қўшилишди.

Aquarius ва унга ҳамроҳлик қилган иккита кемада 630 қочқин бор бўлиб, улар бир ҳафта аввал SOS Mediterranee гуманитар ташкилоти томонидан Ливия соҳиллари яқинида қутқариб олинган. Улар орасида 11 нафар ёш бола, 89 нафар балоғат етмаган ҳамда 7 нафар ҳомиладор аёл бор бўлган.

Валенсияда муҳожирларни 2320 волонтёр, жумладан 470 таржимон кутиб олган.

Аввалроқ Италия ва Мальта ушбу кемани қабул қилишни истамаган. Бу ҳолат Европада муҳожирлар билан боғлиқ яна бир можарони келтириб чиқарган. Натижада қочқинларни Испания қабул қилишга рози бўлган.