Рамзон Қодиров АҚШнинг Шимолий Кавказга бормаслик тавсиясига жавоб қайтарди

Чеченистон раҳбари Рамзон Қодиров АҚШ давлат департаментининг америкаликларга Шимолий Кавказга у ерда давом этаётган” тартибсизликлар ва терактлар” сабабли бормаслик тавсияларига тўхталиб ўтди ва “Вашингтон Россияни АҚШ билан адаштириб қўйган бўлса керак” деб киноя қилди.

Қодировнинг айтишича, Россияга футбол бўйича жаҳон чемпионатида иштирок этиш учун келган терма жамоалар ва мухлислар дўстона қабул қилинган ва “айнан шу ҳолат АҚШ давлат департаменти ва Россияга адоватини билдиришда энг пасткаш усулларни қўлловчи баъзи ғарб ОАВларига ёқмаган”. 

“Давлат департаменти АҚШ фуқароларига Шимолий Кавказ бўйлаб саёҳат қилишни қатъиян тавсия қилмаяпти. Сабаб? Гўёки бутун Шимолий Кавказ бўйлаб тартибсизликлар ва терактлар давом этаётганмиш. Кўзларини пирпиратмай ёлғон гапирадилар. Давлат департаменти қандай тартибсизликлар ва терактлар ҳақида гапирмоқда? Балки улар АҚШ ва Россияни адаштириб қўйишгандир ва АҚШ мактабларида болалар оммавий равишда ўлдирилишини Россияда бўлаётгандек кўрсатишаётгандир?”, деб ёзган Қодиров Telegram’да.

Қодиров Россияга адоватда бўлган ғарб ОАВлари ҳақида гапираркан, мисол сифатида Британиянинг The Guardian нашрини келтириб ўтган. Қодировнинг таъкидлашича, бу нашр муаллифи Миср терма жамоасининг жаҳон чемпионати вақтида Чеченистонда жойлашиш имкониятини “шубҳали соврин” деб атаган. Мисрликлар машғулотларни Грознийдаги “Ахмат Арена” стадионида ўтказишмоқда.

“Шубҳали соврин? Газета кимнинг фикрини баён қилмоқда? Мисрликлар Европадаги энг яхши футбол мажмуасида жойлашишган, ажойиб меҳмонхонада яшашмоқда, минглаб мухлислар эътиборида, қабулдан мамнунлар! Гардиан нега бунга аралашмоқда, тушунарсиз. Мақола муаллифи жамоа ҳаттоки қаерда машғулот ўтказаётганини билмагандан кейин ажабланмаса ҳам бўлади. Нашр Миср терма жамоаси Билимханов номидаги стадионда тўхтаган, деб таъкидламоқда. Мутлақ бехабарлик”, деб қўшимча қилган Қодиров.