«Реал» «Ювентус»нинг таклифини қабул қилди, Роналду тез орада Турин жамоасига ўтади

«Реал» ҳужумчиси Криштиану Роналду эртагаёқ «Ювентус» футболчисига айланиши мумкин.

El Chiringuito хабарига кўра, ушбу трансфер туринликларга 100 миллион еврога тушади. Журналист Хосе Педреролнинг ёзишича, мадридликлар «Юве» таклифини қабул қилишган, келишув ҳақида расман эртага эълон қилиниши кутилмоқда.

Marca нашри тарқатган хабарга кўра, «Реал» ҳужумчиси Криштиану Роналдунинг «Ювентус»га ўтиши масаласи узил-кесил ҳал бўлди, энди фақат келишув ҳақида эълон қилиш қолди, холос.

Хабарда таъкидланишича, «Реал» президенти Флорентино Перес португалиялик юлдузнинг жамоадан кетиш истагига ҳурмат билан қараб, унинг А-серияда янги саргузаштлар бошлашига рухсат берган.

France Football хабарига кўра эса португалиялик юлдуз трансфери 105 миллион еврони ташкил этади.

Бундан аввалги хабарларда, Роналду «Ювентус» билан 4 йиллик шартнома бўйича келишувга эришгани, унга кўра футболчи йилига 30 миллион евро маош олиши айтилганди.