Полициячилар қуролли эркакни отиб ўлдиришганидан сўнг Чикаго шаҳрида норозилик намойишлари бошланиб кетди, деб ёзади Chicago Tribune.
Нашрнинг хабар беришича, ҳодиса шанба куни кечқурун юз берган. Полиция патрули қуролланган эркакни кўриб қолиб, уни текширмоқчи бўлганида қаршиликка учраган ва эркакни отиб ташлаган. Жароҳатланган шахс маҳаллий касалхонага келтирилганида аллақачон жони узилган бўлган.
Газетада ёзилишича, соат 19да (Тошкент вақти билан эрталаб 5да) 71-кўча ва Чэпел кўчаси туташган жойда бир гуруҳ одамлар тўпланган. Намойишчилар сони 150 кишига яқинлашган. Газетанинг хабарига кўра, тўпланганлар полицияни қотилликда айблаган. Норозилик намойиши чоғида ҳеч ким жабрланмагани айтилмоқда.
