Google Android’ни алмаштиришга тайёрланмоқда

Фото: Associated Press

Google компанияси сўнгги икки йил давомида янги мобиль операцион тизимни ишлаб чиқиш билан шуғулланмоқда, у истиқболда Android’ни алмаштириши лозим. Бу ҳақда Bloomberg хабар бермоқда.

Янги лойиҳа Fuchsia («Фучсия») номини олди, ҳамда Google мутахассислари уни «нолдан» яратишмоқда. Бу операцион тизим Android’ни кўплаб кўрсаткичлар бўйича, айниқса қурилмалар билан овозли ўзаро алоқалар соҳасида ортда қолдириши кутилмоқда. Хусусан, бунда ноутбуклардан тортиб интернетга кириши мумкин бўлган митти сенсорлар ҳам қамраб олинади.

Хабар қилинишича, Fuchsia келаётган уч йил давомида гаджетларга аста-секин татбиқ этиб борилади. Google мутахассисларининг умид қилишича, у беш йилдан сўнг бутун дунё бўйлаб қурилмалар 80 фоизида ўрнатилган Android операцион тизимини алмаштира олади.

Тайёрлаган: Отабек Матназаров

#Google #Android