Британиялик Грециянинг Корфу оролидан Британиянинг Бирмингем шаҳрига учувчи самолётга чиптани бронлаб, самолёт бортида кетган ягона йўловчи бўлди. Бу ҳақда The Sun нашри хабар бермоқда.
Бирмингемлик 28 ёшли Саадом Жилани Корфуда дўстининг никоҳ тўйида бўлган. Жилани уйига қайтаётганда унга аэропортда Jet2 авиакомпаниясининг 168 кишига мўлжаланган Boeing 738 рейсида ягона йўловчи бўлиши маълум қилинган.
“Мен бир ўзим учишимдан қаттиқ ҳаяжонга тушдим. Бироқ экипаж аъзолари ҳақиқий профессионаллар бўлиб чиқишди, улар мен билан ҳазил-мутойиба қилишди ва биз кўп кулдик”, деб эсламоқда парвозни британиялик.
Самолёт борткузатувчилари Жиланини “Хусусий самолётга хуш келибсиз, сэр” деб кутиб олиб, унга аъло даражада хизмат кўрсатишган. Эркак учувчилар кабинасида бўлган, стюардессалар билан селфига тушган ва унга хавфсизлик бўйича йўл-йўриқ кўрсатилишини видеога муҳрлаган.
Жиланининг айтишича, Корфу-Бирмингем рейси яқинда жорий қилинган бўлиб, кўпчилик бундан бехабарлиги сабабли ҳам у самолётдаги ягона йўловчига айланган бўлиши мумкин.
Парвоз охирида авиакомпания ходимлари Жиланига 60 фунт стерлинглик ваучер топширишган. У бу ваучердан кейинги парвозида фойдаланиши мумкин бўлади.
2016 йил декабрида ҳам шунга ўхшаш ҳолат юз берган. Уч нафар британиялик аёл British Airways’нинг Гибралтар-Лондон рейсининг ягона йўловчилари бўлишган. Қизларнинг айтишича, самолёт бортида уларга рок-юлдузлар каби эҳтиром кўрсатилган.
