Тошкентда чиқиндиларни электр ва иссиқлик энергиясига айлантирувчи завод қурилиши мумкин

Фото: Тошкент шаҳар ҳокимлиги матбуот хизмати

4 август куни Тошкент шаҳар ҳокимлигида Италиянинг Waste to energy компанияси вакиллари билан учрашув бўлиб ўтди. Бу ҳақда Тошкент шаҳар ҳокимлиги матбуот хизмати хабар бермоқда.

Ушбу ширкат кунига 1200 тонна қаттиқ маиший чиқиндиларни электр ва иссиқлик энергиясига айлантирувчи завод қуришни таклиф этмоқда. Ишлаб чиқаришда ишлатиладиган илғор технологиялар заводнинг аҳоли пунктлари ва мактаблар яқинида хавфсиз ишлашига имкон беради. Келажакда келиб тушаётган хом ашёлардан эко-маҳсулотлар (пластик пакетлар, бир марта ишлатиладиган идишлар, мебель) ишлаб чиқариш кўзда тутилмоқда.

Учрашув якунлари бўйича истиқболли ҳамкорлик тўғрисида келишувга эришилди.

Бундай комплексларнинг қурилиши келгуси авлод учун тоза ва хавфсиз яшаш шароитларини яратади.