Whatsapp мессенжери орқали инсон руҳияти учун хавфли бўлган Momo ўйини тарқалмоқда ва у бир неча мамлакатларни қамраб олган. Мексиканинг Табаско штати Бош прокуратураси бу ҳақда огоҳлантириш билан мурожаат қилган, деб ёзмоқда Тошкент шаҳар ИИББ матбуот хизмати.
“Аргентинанинг Буэнос-Айрес шаҳрида 12 ёшли қизалоқ ўз жонига қасд қилгандан кейин ушбу ўйиннинг инсон руҳиятига салбий таъсири ҳақида жиддий гапирила бошланди. Ушбу ҳолат бўйича суриштирув олиб бораётган полиция ходимлари ўсмирнинг телефонида Momo ўйини борлигини аниқлашган”, - дейилади хабарда.
Хорижий сайтларнинг ёзишича, ўйин яратувчилари ўз мижозларини аввал ижтимоий тармоқлар ва форумлардан излаб топади. Шундан сўнг, ўсмирларга қўрқинчли фотосуратлар ва зўрлаш саҳналари бўлган видеотасвирлар юборадилар ва секин-аста турли буйруқларни бажаришни талаб қила бошлайдилар, мижозга оид турли маълумотларни юборишни сўрайдилар. Агар мижоз рад этадиган бўлса, улар тўғридан-тўғри қўрқитиш йўлига ўтадилар.
Тошкент шаҳар ИИББ ота-оналар ва болаларни эҳтиёт бўлишга чақирган ҳамда мессенжердаги контактлар орасида Momo пайдо бўлиб қолса, уни дарҳол блоклашни тавсия қилган.
