Apple дисплейга бармоқ босиш орқали смартфонни блокдан чиқариш технологиясини патентлади

Америка корпорацияси смартфонни дисплей орқали блокдан чиқариш технологиясини патентлади. Смартфонни ҳимоядан чиқариш учун унинг экранига бармоқни қўйиш керак бўлади, деб хабар берди PatentlyApple.

Хабарда айтилишича, патент олиш учун ариза январда берилган бўлиб, шу кунларда патент рўйхатдан ўтказилди. Apple’нинг билдиришича, технология экран остига жойлаштирилган диэлектрик узаткич асосида ишлайди. Сенсор бармоқ изининг 3D-суратини олади ва iPhone’ни бир лаҳзада блокдан чиқариш имконини беради.

Экспертлар бу технология сканерлашнинг оптик усулига асосланган бошқа экран сенсорларидан фарқланишини қайд этишмоқда. Патент учун ариза iPhone X чиқиб бўлганидан сўнг берилгани сабабли мазкур технология Apple’нинг янги смартфонларида қўлланилиши кутилмоқда.