Ўзбекистон-Тожикистон товар айирбошлаш ҳажми йил бошидан буён қарийб 2,3 баробар ошди

Фото: Sputnik

Ўзбекистон-Тожикистон ўртасидаги товар айирбошлаш ҳажми жорий йил бошидан буён қарийб 2,3 баробар ошди, деб хабар беради Тожикистон Республикаси президенти ҳузуридаги Статистика бўйича агентлик.

«Азия-Плюс»нинг ёзишича, Ўзбекистон Тожикистон ижобий савдо балансига эга бўлган МДҲдаги иккинчи давлатга айланди (Молдовадан сўнг). Ўзбекистон товарларининг импорти 67 миллион долларни ташкил қилди, Тожикистон эса қўшни давлатга тахминан 94 миллион долларлик маҳсулотлар экспортини амалга оширди.

Бунга қадар, мустақилликнинг барча йиллари давомида Ўзбекистон товарлари импорти Тожикистон маҳсулотлари экспортидан кўпроқ бўлган.

Жорий йилнинг март ойида Душанбедаги Тожикистон-Ўзбекистон бизнес-форуми якунлари бўйича Тожикистондан Ўзбекистонга 482 миллион долларлик товар ва хизматлар экспорт қилишни назарда тутадиган 16та ҳужжат имзоланди. Шу билан бирга, ўзбек маҳсулотларининг импорти 143 миллион долларга тенг бўлиши керак.

Ҳозирги вақтда Тожикистон қўшни республикага бирламчи алюминий, электр энергияси, пахта толаси, руда, цемент, ишлов берилмаган чарм, пилла, ипак хомашёси, турли газламалар, спиртли ичимликлар, гилам ва шунга ўхшаш нарсаларни экспорт қилмоқда.

Ўзбекистондан импорт қилинадиган товарлар орасида тўқимачилик маҳсулотлари, минерал ўғитлар, пластмасса, пойабзал, керамика, рангли металлар, электр ва механик ускуналар бор.