Лавров БМТ котибиятининг махфий тақиқи ҳақида гапирди

Россия ташқи ишлар вазири Сергей Лавровнинг маълум қилишича, БМТ котибияти ўз бўлинмаларига Суриядаги инфратузилмани тиклашда иштирок этишни махфий тарзда тақиқлаб қўйган. Бу ҳақда РИА «Новости» хабар тарқатди.

Унинг иддао этишича, Сурияни тиклашда инсонпарварлик ёрдами билан иштирок этишни чекловчи махфий директива 2017 йилнинг кузида БМТ томонидан чиқарилган.

«Маълум бўлишича, БМТ котибиятининг сиёсий департаменти ҳақиқатдан ҳам ўтган йил октябр ойида тизимга кирувчи ташкилотларга Сурия иқтисодиётини тиклаш бўйича қандайдир лойиҳаларда иштирок этишни тақиқловчи директивани чиқарди ва БМТ тизимида тарқатди», - деган Лавров.

Унинг таъкидлашича, Бирлашган Миллатлар Ташкилоти ўз бўлинмаларига Сурияни тиклаш ишлари билан «фақатгина сиёсий ўтиш деб аталмиш жараёнда муваффақиятга» эришилганидан сўнг рухсат беради.