Испанияда дерби, «Ливерпуль» «Лестер»га қарши. Ҳафтанинг асосий ўйинлари

Бугун ва эртага Германия, Франция ҳамда Испанияда ҳам трансферлар даричаси ёпилади. Футбол майдонларида эса, терма жамоалар билан боғлиқ танаффус олдидан жамоалар сўнгги ўйинларини ўтказади. Албатта, бу ўйинлар ичида олдиндан эътиборга лойиқ бўлган қизиқарли ўйинлар бор.

МИЛАН – РОМА (31 август, 23:30)

Италияда ҳам ўзига яраша Топ-5 шаклланиб қолгани туфайли, деярли ҳар турда катта ўйинларга гувоҳ бўляпмиз. Дастлабки турдаги ўйини қолдирилган миланликлар ўтган ҳафтада «Наполи»га сафар қилишган ва 2:0 ҳисобидаги устунликни бой бериб, 2:3 ҳисобида мағлуб бўлиб қайтишганди. «Рома» учун эса, бу мавсумдаги илк топ ўйин бўлади. Шундай бўлса-да, аввалги турларда римликларга қарши ўйнаган «Торино» ва «Аталанта» ҳам лиганинг кучли жамоалари саналишади. «Рома» ўз майдонида «Аталанта»дан 1:3 ҳисобида орқада бориб, якунда бир очко олишга муваффақ бўлди. Демак, кўриб турганингиздек, ҳар икки жамоада икки хил кайфият – «Рома» ирода кўрсатган бўлса, «Милан» яхши устунликни қўлдан чиқариб, мағлубиятга учради.

Икки жамоа ўртасидаги ўйинлар доим жуда қизғин кечган. Масалан, ўтган мавсумдаги ҳар икки ўйинда ҳам меҳмон жамоа бир хил – 2:0 ҳисобида ғалаба қозонган. Умуман, «Милан»нинг ўз майдонида «Рома» устидан сўнгги ғалабаси 2015 йилга тўғри келади.

Таркибларга келсак, «Милан»да катта муаммо йўқ, фақат Иван Стринич узоқ муддатга сафдан чиққан холос. У оғир хасталик туфайли номаълум муддатга футболчилик фаолиятини тўхтатган. Римликлар жамоасида эса, Алесандро Флоренци ҳали таркибга қайтгани йўқ. Аммо мавсумолди йиғинларида сафдан чиққан аргентиналик ярим ҳимоячи Диего Пероттини бугун майдонда кўришимиз мумкин.

ЛЕСТЕР – ЛИВЕРПУЛЬ (1 сентябрь, 16:30)

«Ливерпуль» кутилганидек, мавсумни жуда кучли бошлади ва ҳақли равишда уч турдан кейин турнир жадвалини бошқариб турибди. Жамоанинг кўп гол уриши янгилик эмас, аммо шу паллада Клопп шогирдлари ҳали ўз дарвозасидан гол ўтказмаган АПЛдаги ягона жамоа ҳам бўлиб турибди. «Ливерпуль»нинг янги трансферлари жамоа ўйинига аввало, мувозанат олиб кирганини қайд этиш керак.

Аммо «Лестер» анойи эмас ва «Ливерпуль» учун жуда жиддий синов деб айтиш мумкин. Лестерликларнинг ўйин услуби, ўта тезкор қарши ҳужум тактикаси «Ливерпуль»нинг юқори прессинги учун жуда хавфлидир. Чунки, бу ҳолда «Ливерпуль» ярим майдонида жуда катта бўшлиқлар юзага келади. Узун паслар орқали Вардини қулай вазиятларга чиқариш «Лестер»нинг сўнгги уч йилдаги энг кўп амалга оширган машғулотидир, яъни дарвозабондан тортиб, ҳар бир футболчи бу ишни қандай бажаришни жуда яхши билади.

Риёз Маҳрезнинг кетиши «Лестер»нинг ҳужумларни ташкил қилиш салоҳиятига жиддий зарба бўлди. Шу билан биргаликда, жамоанинг янги аъзоси Мэддисон илк турларда ўзини жуда яхши намойиш қила олмоқда. Дастлабки турда «Олд Траффорд»да мағлубиятга учраган бўлса-да, мезбонлардан кам ўйин намойиш этмаган «тулкилар» кейинги икки турни ғалаба билан якунлашди.

«Лестер» ўз майдонида доимий равишда «Ливерпуль»га муаммо туғдирган, масалан, бу ердаги сўнгги уч ўйиндан иккитаси «Лестер»нинг ғалабаси билан якунланган. Ўтган йили ҳам Клопп «Кинг Пауэр»дан қандай қилиб ғалабани олиб кетгани эсингизда бўлса керак. 1:3 ҳисобида ортда бораётган «Лестер» ўйинда бурилиш ясай олган ва фақат Вардининг пенальтини амалга ошира олмагани ҳисобнинг тенглашишига йўл қўймаганди.

«Лестер» таркибида Мэтью Жеймсдан бошқа ҳамма соғ-саломат. «Ливерпуль»да эса, Деян Ловрен бу сафар ҳам майдонга туша олмаса керак. Алекс Окслейд-Чемберлейннинг қайтишига ҳали жуда кўп вақт бор.

ЛЕВАНТЕ – ВАЛЕНСИЯ (2 сентябрь, 15:00)

Дерби. Испанияда бирор ўйинни таърифлаш учун мана шу сўзнинг ўзи кифоя. Бу ерда дербилар Англиядаги каби дўстона ҳам ўтмайди, Италиядаги каби жанжалларни ҳам кузатмаймиз. Чин маънодаги дербини, яъни айнан майдоннинг ўзида аёвсиз курашни айнан Испанияда томоша қилишимиз мумкин.

Турнир жадвалидаги ҳолатдан қатъи назар, «Леванте» доимо «Валенсия»ни қийнаб келган. Айниқса, ўз майдонида. Масалан, ўтган мавсум бошида «Валенсия» жуда кучли ўйнаган ва пешқадамлар сафида борган, лекин шундай бўлса-да, «Леванте» дербида очко олишга муваффақ бўлганди. Балки тескариси, «Валенсия» бир очкога эга бўлгандир. Сабаби, бу стадионда ўтган ундан олдинги тўрт ўйинда «Леванте» ғалаба қозонишнинг уддасидан чиққан эди.

Бу сафар «Валенсия» бироз муваффақиятсиз бошлади. «Атлетико» билан дуранг устига кейинги ўйинда «Эспаньол»дан қабул қилинган 0:2 ҳисобидаги мағлубият жуда оғир қабул қилингани шубҳасиз. «Леванте»нинг стартини ҳам барқарор деб бўлмайди. «Бетис» майдонида 3:0 ҳисобида ажойиб ғалабага эришган Рако Лопес шогирдлари кейинги ўйинда ўз майдонларида «Сельта»га ютқазиб қўйди. Бу ўйинларда Хосе Луис Моралеснинг  иккинчи ёшликни бошлаб юборганини таъкидлаш керак. 31 ёшли футболчи икки ўйинда уч гол уриб бомбардирлар руйхатининг бошига чиқиб олди.

УОТФОРД – ТОТТЕНҲЭМ (2 сентябрь, 20:00)

«Уотфорд» лондонликлар учун жуда қулай рақиб саналса керак, зеро жамоа 2012 йилда АПЛга қайтганидан буён, ҳали бирор марта «Тоттенҳэм» устидан ғалаба қозона олмаяпти. Аммо бошқа жиҳат бу ўйинни турнинг марказий учрашувларидан бирига айлантиради.

«Уотфорд» кўпчилик учун кутилмаганда, «Ливерпуль», «Челси» ва «Тоттенҳэм» билан бир қаторда юз фоизлик натижа кўрсатиб, турнир жадвали юқорисидан жой олиб турибди. Аслида «Уотфорд» учун бу янгилик эмас, икки йил олдин ҳам жамоа кўп вақт кучли тўртликда борганди.

Тўғри, «Уотфорд» уч турда фақат ўртамиёна жамоалар билан ўйнади, лекин Англияда уч ўйинда қаторасига ғалаба қозониш осон эмас. Умуман, гап фақат мана шу уч ўйинда ҳам эмас, «Уотфорд» ёзни жуда яхши ўтказди, мавсумолди йиғинлардаги 5 ўртоқлик учрашувларида ҳам жамоа мағлубият нималигини билмади. Энди бунга, августдаги тўртинчи расмий ўйинни қўшинг – Хави Грасия шогирдлари куни-кеча Англия Лига кубогидаги дастлабки босқичда «Рединг»ни мағлубиятга учратиб қайтишди. Дарвоқе, мана шу омил, яъни «Уотфорд»нинг ҳафта ўртасида ортиқча ўйин ўтказгани «Тоттенҳэм»га бироз ёрдам бериши мумкин.

Почеттино жамоаси «Олд Траффорд»даги ажойиб ғалабадан кейин жуда яхши кайфиятда экани шубҳасиз. «МЮ»га қарши ўйинда «Тоттенҳэм» ҳисобдаги қадар устунлик қилмаган ва кўпчилик фақат омад «Тоттенҳэм»га кулиб боққанини айтган бўлса-да, бу янада позитив хулосаларга сабаб бўлади – демак, «Тоттенҳэм» керак пайтда ўзига бегона услубда ҳам ўйнай олиши, майдонда иккинчи рақамли жамоа бўлиб ҳам, рақиб хатосидан унумли фойдаланиши мумкин. Дастлабки турларда, айниқса, Лукас Моуранинг ажойиб спорт формасига кирганини эътироф этиш керак.

Мезбонлар таркибида Жерар Делофеу тикланиб олди, аммо бу ўйинга тайёр бўлмаса керак. Шунингдек, Бритос ва Клеверли, бир пайтлар «Тоттенҳэм» сафида ўйнаган Юнус Қобул ҳам жароҳат туфайли жамоасига ёрдам бера олмайди. Почеттино эса, Осиё ўйинларидаги Сон Хон Миндан ташқари, Ламела ва Ваньяманинг хизматларидан фойдалана олмайди.    

ЗЕНИТ – СПАРТАК (2 сентябрь, 21:00)

«Зенит» беш турдан кейин юз фоизлик натижа билан турнир жадвалида пешқадам бўлиб олган бўлса-да, «Спартак»нинг (беш ўйинда тўрт ғалаба, бир дуранг) перформанси эътиборга моликроқ. «Зенит»га рақиб бўлган энг кучли жамоа – «Рубин», қолгани «Арсенал», «Енисей», «Уфа» каби жамоалар бўлса, «Спартак» мана шу беш турда «Локомотив» ва «Краснодар» меҳмони бўлиб улгурди, «Динамо» билан дербида майдонга тушди. Шу қийин тақвимда ҳам «Спартак» «Зенит»ни жуда яқин таъқибга олгани таҳсинга лойиқ.

Лекин «Спартак»нинг бошқа муаммоси ҳам бор. Жамоанинг сўнгги йиллардаги етакчи ҳужумчиси ва тўпурари, нидерландиялик Куинси Промес Ла Лигага йўл олди ва «Севилья» аъзосига айланди. Бу жуда катта йўқотиш. Питерликлар жамоаси таркибида Александр Кокорин ниҳоят машғулотларга киришган ва у иккинчи бўлимда жамоасига ёрдам бериши мумкин.

Ўзаро ўйинларга келсак, сўнгги йилларда бу тўқнашувларда асосан мезбон жамоа ғолиб келган ёки дуранг бўлган. Меҳмон жамоанинг сўнгги ғалабасини қидирсак, 2012 йилгача бориб қолишимиз мумкин. Ўтган йилнинг августида «Зенит» майдонида бўлиб ўтган ўйинда мезбонлар 5:1 ҳисобида ғалаба қозонишган эди.

Дарвоқе, Артем Дзюба яна «Спартак»ка қарши. Бу ҳам сўнгги мавсумлардаги эътиборга арзирли воқеа бўлиб келмоқда. Дзюба доимий равишда собиқ жамоасини хафа қилишни канда қилмаяпти.

МОНАКО – МАРСЕЛЬ (2 сентябрь, 23:59)

Уч турдан кейин «ПСЖ»нинг ёнида «Дижон», «Ним» каби жамоалар юрибди, у ерга ярашадиган икки клуб эса, 4 тадан очко тўплаб тўққизинчи ва ўнинчи ўринларни эгаллаб туришибди. Энди булардан қайсидир, балки иккаласи ҳам янада пастроққа шўнғиши шу турда рўй беради.

Биринчи турда «Тулуза» устидан 4:0 ҳисобида ажойиб ғалабага эришган «Марсель»ни бу мавсумда пешқадамга қаршилик қилиши мумкин бўлган асосий даъвогар деб билишганди, аммо иккинчи турдаёқ дебютант «Ним» марселликларни осмондан тушириб қўйди. Кейин эса, «Марсель» ўз майдонида «Ренн»ни енга олмади. «Монако»нинг ҳолати ҳам шунга яқин, фақат улар ягона мағлубиятни «Бордо»дан, яъни кучлироқ клубдан қабул қилганликлари билан ўзларини овутишлари мумкин.

«Монако»нинг сўнгги йиллардаги муваффақиятларидан келиб чиққанда, бу жамоанинг «Марсель» устидан яққол устунлиги мантиқан тўғри. Ҳатто аксинча, нима бўлгандаям лиганинг кучли жамоаларидан бири бўлган «Марсель» устидан сўнгги 4 ўйиндан учтасида йирик ҳисобда ғалаба қозонган «Монако»нинг бироз омади келганини ҳам айтиш мумкин. Хусусан, роппа-роса бир йил олдин, 2017 йилнинг 28 августида «Монако» «Марсель» устидан 6:1 ҳисобида ғалаба қозонганди. «Олимпик» Монакодан охирги марта 2011 йилнинг январида очко олиб кетган – ўша ўйинда ҳисоб очилмаганди. Шундан буёғига доимий равишда мезбонлар ғалаба қозониб келишмоқда. Барча ўйинлардаги охирги ғалабани марселликлар 2015 йилнинг майида қўлга киритишган.

Таркиблар борасида муаммо ҳар икки жамоада ҳам у қадар катта эмас. Мезбонларда Ражжи ва Йоветичдан ташқари, янги харид қилинган Александр Головин ҳали тикланиб улгурмаган бўлса, «Марсель» таркибида Роландо, шунингдек, дарвозабон Стив Манданда жамоасига ёрдам бера олмайди.

БОШҚА ЎЙИНЛАР

31 август. «Ҳанновер-96» – «БОРУССИЯ» Д (23:30)

1 сентябрь. «ЧЕЛСИ» – «Борнмут» (19:00) «Ним» – «ПСЖ» (20:00), «Болонья» – «ИНТЕР» (21:00), «Штутгарт» – «БАВАРИЯ» (21:30), «МАНЧЕСТЕР СИТИ» – «Ньюкасл» (21:30), «Парма» – «ЮВЕНТУС» (23:30), «РЕАЛ» – «Леганес» (23:45).

2 сентябрь. «Кардифф» – «АРСЕНАЛ» (17:30), «Бёрнли» – «МАНЧЕСТЕР ЮНАЙТЕД» (20:00), «Уотфорд» – «ТОТТЕНҲЭМ» (20:00), «БАРСЕЛОНА» – «Уэска» (21:30), «Сампдория» – «НАПОЛИ» (23:30).