Польшада Осиёдан келган ишчилар украиналик мигрантларни сиқиб чиқармоқда

Фото: Kacper Pempel / Reuters

2018 йилнинг биринчи ярмида Польшага Осиё мамлакатларидан меҳнат миграцияси бир неча бараварга ошди, Украинадан гастарбайтерлар келиши эса кескин камайди. Бу ҳақда оила, меҳнат ва ижтимоий ҳимоя вазирлиги маълумотларига таяниб Польшанинг Dziennik газетаси хабар қилди.

2017 йилга нисбатан непаллик гастарбайтерлар келиши энг кўп – олти бараварга, Озарбайжон, Бангладеш, Хитой, Филиппин, Ҳиндистон, Ўзбекистон ва Вьетнамдан ишчилар келиши икки-уч бараварга ошган.

Польшада ишлаётган хорижликларнинг катта қисмини украиналиклар ташкил этади. Агарда 2017 йилнинг биринчи ярим йиллигида Украинадан ишчилар келиши йиллик 114%ни ташкил этган бўлса, 2018 йилнинг биринчи ярмида уларнинг сони атиги 20%га ўсган.

Personnel Service кадрлар агентлиги президенти Кшиштоф Инглотнинг айтишича, украиналиклар кўпроқ Германия, Чехия, Словакия ёки Венгрияда ишлашни маъқул кўришмоқда.

«Осиё мамлакатлари фуқароларининг украиналикларни сиқиб чиқаришига сабаб, Днепр қирғоқларидан келганлар ойлик маошлари оширилишини сўрашади, Непалдан келганлар эса бундай қилишмайди», — деди Инглот.

EWL кадрлар агентлиги президенти Анджей Коркуснинг сўзларига кўра, Польшага Осиёдан электрчилар, дастурчилар, ғишт терувчилар, пайвандчилар, чеварлар, слесар ва оддий ишчилар келишмоқда.

«Ишчи кучи етишмаслиги шу даражада кескинлашганки, ҳукумат Филиппин раҳбарияти билан музокаралар олиб бормоқда. Музокаралар ушбу мамлакат фуқароларини ишга қабул қилиш билан боғлиқ», — деди Коркус.

2018 йил февралда Gazeta Prawna газетаси «Польша иқтисодиётига энг катта таъсир кўрсатаётган 50 киши» рейтингида иккинчи ўринни украиналик мигрантларга берганди. Нашр украиналикларни «Польша иқтисодиётиининг жамоавий қаҳрамонлари» деб атаганди. Нашрнинг ёзишича, 2014 йилдан буён шарқдан келаётган миграция тўлқини 350%га ўсган, бунда украиналик мигрантларнинг келиши Польша ижтимоий суғурта тизимига ижобий таъсир кўрсатмоқда, чунки улар бадал тўлашади.

Украина ҳукумати эса аксинча, ишчи кучининг кетиб қолишидан ташвишда. Апрелда мамлакат бош вазири Владимир Гройсман мамлакат фуқароларининг бошқа давлатларга ишлагани кетиб қолишининг олдини олиш учун инвестициялар ҳисобига иш ўринлари ҳамда меъёрдаги яшаш шароитини яратиш кераклигини таъкидлаганди.