Россияда мигрантларни тиббий кўрикдан ўтказиш муддати қисқартирилади

Россия мигрантлар учун тиббий кўрик ёки текширувдан ўтиш муддатини 90 кундан 30 кунга қисқартирмоқда. Ушбу ўзгаришлар жорий йилнинг 1 сентябридан кучга киради. Агар мигрант 30 кун ичида тиббий кўрикдан ўтмаса, унга жарима солиниши ва мамлакатдан чиқариб юборилиши мумкин.
Тегишли тузатишлар Россия парламентининг юқори палатаси - Федерация Кенгаши томонидан маъқулланган.
Вақтинча яшаш ёки ишлаш учун рухсатнома олиш учун тиббий кўрикдан ўтиш мажбурийдир.
Ҳозир мигрантлар Россияга киргандан кейин 90 кун ичида ОИВ каби хавфли юқумли касалликлар йўқлигини, шунингдек, гиёҳванд моддаларни истеъмол қилмаслик фактини тасдиқлаш учун тиббий кўрикдан ўтиши шарт. Янги ўзгартиришларга кўра, бу муддат 30 кунгача қисқартирилмоқда.
Бундан ташқари, Россияда 30 кундан ортиқ бўлган мигрантлар ҳар йили тиббий кўрикдан ўтиши керак бўлади. Шу пайтгача Россияга узоқ муддатга (90 кундан ортиқ) борган меҳнат мигрантлари ва чет эл фуқаролари бундай текширувдан фақат бир марта ўтиши шарт эди.
Тиббий кўрик харажатлари мигрантнинг ўзи ёки иш берувчи томонидан тўланади.
Ушбу ўзгаришларга кўра, тиббий кўрик фақат ваколатли тиббиёт муассасалари томонидан ўтказилиши мумкин ва бу жараёнда воситачилар фаолияти тақиқланади.
Текширув якунлангач, соғлиқни сақлашнинг ягона давлат ахборот тизимига киритиладиган тиббий хулоса (шу жумладан электрон шаклда) берилади. Агар мигрантда хавфли касаллик аниқланса, тиббий муассаса 24 соат ичида бу ҳақда Россия Ички ишлар вазирлиги ва «Роспотребнадзор»ни хабардор қилиши шарт.
Тиббий кўрикдан ўтишдан бўйин товлаган чет эл фуқаролари 25 мингдан 50 минг рублгача жаримага тортилади ва Россиядан чиқариб юборилади. Бундан ташқари, жарима ўз вақтида тўланмаган тақдирда унинг миқдори икки бараварга оширилади.
Тиббий кўрикдан ўтиш тартибига риоя қилмаган, шу жумладан 30 кун ичида гиёҳванд моддани истеъмол қилиш ва хавфли юқумли касалликлар (айниқса ОИВ) бор-йўқлигини аниқлаш учун текширувдан ўтмаган мигрантлар ва чет эл фуқаролари 25 минг рублдан 100 минг рублгача жаримага тортилиши мумкин.
Россия президенти имзолаганидан сўнг, қонун 2026 йил 1 сентябрдан кучга кириши кутилмоқда.