Москвадаги Цветной бульварда “рақсга тушувчи одамчали” антиқа светофор пайдо бўлди

Москвада Шаҳар кунига атаб “рақсга тушувчи одамчали” антиқа светофор ўрнатилди. У Никулин цирки ёнида, Цветной бульвардаги пиёдалар ўтиш жойида пайдо бўлган.

Бундай светофорни ўрнатишдан мақсад шуки, одамлар унда “рақсга тушаётган одамча”ни кўриб, йўлни қизил рангда югуриб ўтишдан тўхтайдилар. Бундан ташқари, яшил сигнални кутиш вақтида пиёдалар ўзлари ҳам рақсга тушишлари мумкин.

Светофорнинг қизил чироғида акс этувчи одамча кўринишидаги белги ҳаракатсиз турмай, рақсга тушиб туради. Светофор яқинида кичик кабина ўрнатилган бўлиб, пиёдалар унга кириб, турли ҳаракатлар бажаришлари мумкин бўлади. Уларнинг ҳаракатлари махсус камералар томонидан сканер қилинади. Сўнгра кабинадаги одам ҳаракатлари реал вақт режимида светофорнинг қизил чироғида намойиш қилинади. Яъни светофорда кабинадаги одам ҳаракатлари такрорланади.

Кабинада одам бўлмаганда эса светофор оддий режимда ишлайди: унда юриб кетаётган ёки бир жойда турган пиёда белгиси аксланади. Светофор барча хавфсизлик талабларига жавоб беради: “рақсга тушувчи одамча” фақат қизил чироқда кўрсатилади.

“Шаҳар кунига пиёдаларга байрамона кайфият совға қилишга қарор қилдик. Яшил сигнални кутиш зерикарли бўлмаслиги ва қизил сигналга йўлдан югуриб ўтиш истаги пайдо бўлмаслиги мақсадида “рақсга тушувчи одамчали” светофор ўрнатдик. Бундан ташқари, светофор одамларнинг кайфиятини кўтаради. Мисол учун, улар ишларидан чарчаб уйларига қайтаётганларида рақсга тушаётган одамчани кўриб табассум қила бошлайдилар”, деб айтган Йўл ҳаракатини ташкиллаштириш маркази раҳбари Вадим Юрьев.

Унинг айтишича, антиқа светофорнинг ўрнатилиш жойи бежиз танланмаган: Никулин циркига кўплаб болалар келишади ва “рақсга тушувчи одамчали” светофор айниқса уларнинг эътиборини кўпроқ тортади. Таъкидланишича, шунга ўхшаш қурилма Европада синовдан ўтказилган. 

Москвада июлда яна бир антиқа “гапирувчи” светофор синовдан ўтказила бошланган. Унда яшил чироқ ёнганда, карнай ишга тушади. У шаҳарликларга йўлдан ўтиш мумкинлиги ва яшил чироқ амал қилишига қанча сония қолганини айтиб туради. Қизил чироқ ёниши билан светофор бу ҳақда ҳам маълум қилади.

Айтиш жоизки, ҳозирда Тошкент кўчаларида ҳам яшил чироқ амал қилиши тугашига қанча сония қолганини кўрсатиб турувчи светофорлар ўрнатилмоқда.