Содиқ Сафоев Мубашир Жавод Акбар билан музокаралар ўтказди

Ўзбекистон Республикаси Олий Мажлиси Сенати раиси биринчи ўринбосари Содиқ Сафоевнинг “Ҳиндистон – Марказий Осиё” мулоқотининг бешинчи мажлисида иштирок этиш доирасида мамлакатда бўлиб турган Ҳиндистон ташқи ишлар давлат вазири Мубашир Жавод Акбар билан учрашуви бўлиб ўтди.

Ўзбекистон Республикаси Олий Мажлиси Сенатининг ахборот хизмати хабарига кўра, учрашувда икки томонлама муносабатларнинг истиқболлари, шу жумладан жорий йил октябрда Ўзбекистон Республикаси президенти Шавкат Мирзиёевнинг Ҳиндистонга давлат ташрифини ташкил этишга доир масалалар муҳокама қилинди.

Томонлар Ўзбекистон ва Ҳиндистон ўртасида дўстлик ва стратегик ҳамкорлик муносабатлари илдам ривожланиб бораётганини таъкидлади. Кўп асрлик маданий ва савдо-иқтисодий алоқаларга, энг аввало, халқларимиз ўртасидаги чин дўстлик ришталарига асосланган Ўзбекистон-Ҳиндистон муносабатлари юксак даражадаги икки томонлама ҳамкорлик сифатида тавсифланади.

Ўзбекистон Республикаси президентининг Ҳиндистонга давлат ташрифига тайёргарлик кўриш доирасида қўшма тадбирлар амалга оширилаётгани қайд этилди. Хусусан, Ҳиндистонда Ўзбекистон Республикасининг маданият кунлари муваффақиятли ўтказилди. “Ҳиндистон – Марказий Осиё” мулоқоти Ҳиндистон ва Марказий Осиё мамлакатлари ўртасидаги сиёсий ва иқтисодий ҳамкорликнинг бугунги ҳолати ва истиқболларини, барқарор тараққиётга хавф солувчи таҳдидларга қарши курашиш, икки томонлама ва кўп томонлама алоқаларни, транспорт-логистика ва инвестиция соҳаларидаги ҳамкорликни ривожлантириш масалаларини муҳокама қилиш учун ўзига хос майдонга айланди.

Томонлар парламентлараро ҳамкорликни, шу жумладан  парламентлараро дўстлик гуруҳлари йўналишида ҳам мустаҳкамлаш масалаларини муҳокама қилдилар. Ҳозирги вақтда Ўзбекистон Республикаси Олий Мажлисида Ҳиндистон Республикаси Парламенти билан ҳамкорлик бўйича дўстлик гуруҳи ўз фаолиятини олиб бормоқда.

Учрашув якунлари бўйича Мубашир Жавод Акбар Ўзбекистон ва Ҳиндистон қўшма тадбирларини муваффақиятли ўтказиш учун барча саъй-ҳаракатларни ишга солишга тайёрлигини билдирди.