Эрон Исроилни ядровий қурол ишлаб чиқаётганликда айблади

Эрон ташқи ишлар вазири Муҳаммад Жавод Зариф Исроил бош вазири Биньямин Нетаньяху Теҳронда махфий “атом омбори” топилганини айтгандан сўнг Исроилни “ноқонуний ядровий қурол дастури”ни олиб бораётганини тан олиш ва халқаро инспекторларга у билан танишишга йўл беришга чақирган.

“Санъат ва ҳунармандчилик шоуси Исроил минтақамизда “ҳақиқий ядровий қурол”ни ўз ичига олувчи “махфий” ва “овоза қилинмаган” ядровий қурол дастурига эга ягона тузум эканини яшира олмайди. Исроил ядровий қурол дастурига эгалигини тан олиши ва халқаро инспекторларга у билан танишишга йўл бериши вақти келди”, деб ёзган Зариф твиттерда. 

Нетаньяху БМТ минбаридан Исроил разведкаси Теҳронда тонналаб ядровий қурилма ва материаллар сақланадиган махфий омборни аниқлаганини айтган. У ўз сўзлари исботи сифатида сунъий йўлдошдан олинган, темир эшикка эга девор суратларини намойиш қилган.

Исроил бош вазирининг айтишича, бу объект ичида умумий оғирлиги 300 тоннага етиши мумкин бўлган камида 15 та контейнер мавжуд. Таъкидланишича, объект йил бошида Исроил разведкаси томонидан ўғирланиб, Эрондан махфий равишда олиб чиқиб кетилган атом лойиҳаси архиви сақланган жой яқинида жойлашган. Нетаньяху МАГАТЭ’ни зудлик билан шу ҳудудда текширув ўтказишга чақирган.