Япониянинг Окинава префектураси янги губернатори АҚШ базаларининг олиб чиқилиши тарафдори бўлиши мумкин

Япониянинг Окинава префектураси губернатори сайловларида мухолифатчи ва АҚШ ҳарбий базаларининг префектура ташқарисига олиб чиқилиши тарафдори Дэнни Тамаки етакчилик қилмоқда. Бундан “Киодо” ахборот агентлиги ва NHK телеканали ўтказган экзит-полл натижалари дарак бермоқда. Уларга кўра, Тамаки катта эҳтимол билан префектура губернатори бўлиши мумкинлиги келиб чиқмоқда.

Окинава губернатори сайловлари 30 сентябрда бўлиб ўтди. Префектуранинг янги губернаторини сайлаш зарурати собиқ губернаторнинг август ойида вафот этгани билан боғланган. Тамаки аввалги губернаторнинг АҚШ базаларининг олиб чиқилиши борасидаги сиёсатини давом эттиришини айтган, бу эса Япония марказий ҳукумати позициясига зид келади.

Окинава ҳудуди Япониянинг бор-йўғи 0,6 фоизини ташкил қилса-да, у ерда АҚШнинг Япониядаги ҳарбий объектларининг 74 фоизи ва ҳарбийларининг ярмидан кўпи жойлашган. Префектура маъмурияти маълумотларига кўра, Окинавада 22,5 минг америкалик ҳарбий ҳамда улар оилаларининг 19 минг аъзоси ва бошқа америкаликлар бор.