Дунё лифтлари: улардан қай бири энг ғаройиб?

Илк лифтлар эрамиздан олдин пайдо бўлган. Мисрда пирамидалар қурилишида фойдаланилган қурилмаларни замонавий конструкцияларнинг аждоди деб аташ мумкин. Ҳозирда лифтлар ҳақиқий санъат асарига айланди. Улардан энг ғаройиблари ҳақида сўз юритамиз.

Elevador de Santa Justa

У Лиссабонда, шаҳарнинг қоқ марказида жойлашган. Кабинадан туриб кузатиладиган манзара кишини лол қолдиради. Айнан шу сайёҳларни ўзига жалб этади. Маҳаллий аҳоли бир майдондан иккинчисига катта тепалик орқали ўтишади. Мазкур кўтариш қурилмаси 1902 йилдан бери ишлайди. Сиғими – 29 нафар киши.

Elevador Lacerda

У Бразилиянинг собиқ пойтахти – Сальвадорда жойлашган. Қурилма сабаб тарихий марказдан ишбилармонлик туманларига муаммосиз етиб олиш мумкин. Жами кабиналар сони – 4 та. Бир вақтнинг ўзида 32 киши сиғади. Умумий баландлик – 70 метрдан ортиқ. Бу ерда йўл ҳақи пуллик.

Louvre

Эҳтимол француз қироллари Лувр бу каби замонавий қурилмага эга бўлишини хаёлларига ҳам келтиришмаган бўлса керак. Лифт полдан “ўсиб чиқади”. Кабинага 10 тагача киши сиғади. Истовчилар сарой интерьерини томоша қилишлари учун лифт секин ҳаракатланади

SkyTower

Бу телевизион минора – Янги Зеландиянинг рамзи. 200 метр баландликда жойлашган томоша майдонига кўтарма қурилмаси ёрдамида чиқиш мумкин. Тўғри, у жуда тез юради. Бир дақиқадан кам вақт давомида энг юқорида бўлиб қоласиз.

Байлонг

Дунёдаги энг баланд лифт ҳисобланади. Ушбу хитой лифтининг баландлиги – 330 метр! Унинг вазифаси – сайёҳларни томоша майдонига етказиш. Ичкаридаги 3 та кабина шаффоф деворларга эга. Шунинг учун бир вақтнинг ўзида манзарадан баҳраманд бўлиш ҳам мумкин.

Фолкер ғилдираги

Ғаройиб қурилма Шотландияда жойлашган. У кемалар учун лифт ҳисобланади. У Форт-Клайд ва Юнион каналлари орасидаги кемаларни ўзига жойлаштиради. 180 даражага айлана олади.