Россия Польшага таҳдид қилди

Польшанинг мамлакат ҳудудида Америка дивизиясини жойлаштириш режаси Москвани жавоб чораларини кўришга мажбур қилади. Бу ҳақда Россия мудофаа вазири баёнот берди, деб хабар қилди РИА Новости.

«Бундай ҳолатда биз (...) барча йўналишлардаги эҳтимолий ҳарбий таҳдидларни бартараф қилишга тайёр туришимиз керак бўлади», — деди у. Шойгунинг сўзларига кўра, Польшанинг уринишлари бесамар ҳамда минтақа хавфсизлиги барқарорлиги ва мустаҳкамлигини таъминлай олмайди.

Мудофаа вазири Москва хавфсизлик соҳасида ҳамкорлик қилишга уринаётганини ва Ғарб билан ҳарбий низога киришишни истамаётганини таъкидлади.

23 октябрь куни Польша президенти Анжей Дуда АҚШнинг Ўрта ва кичик масофага мўлжалланган ракеталарни йўқ қилиш ҳақидаги шартномадан чиқиши муносабати билан мамлакат ҳудудида Америка қуролларини жойлаштириш масаласи ҳозирча муҳокама қилинмаганини маълум қилди.

АҚШ президенти Дональд Трамп 20 октябрь куни Қўшма Штатлар шартномадан чиқишини билдирганди. Унинг сўзларига кўра, Москва мазкур шартномани бузаётганлиги учун шундай қилишга мажбур бўлган. У Россия ва Хитой билан янги келишув тузилиши мумкинлигини маълум қилди.

Россия ТИВ ракеталар бўйича янги шартнома тузиш имкониятини инкор қилди ва АҚШни жавоб чоралари кўриши ҳақида огоҳлантирди.