БМТда Шимолий Кореяда инсон ҳуқуқлари бузилишини қораловчи янги резолюция тақдим қилинди

БМТда Шимолий Кореяда инсон ҳуқуқлари бузилишини қораловчи янги резолюция тақдим қилинди. Бу ҳақда “Рёнхап” ахборот агентлиги хабар берди.  

Европа Иттифоқи ва Япония томонидан ташаббус билдирилган резолюция 31 октябрда гуманитар масалалар билан шуғулланувчи Учинчи қўмитага тақдим қилинган. 

Таъкидланишича, янги ҳужжат аввалги йилдагисига ўхшаш бўлиб, “КХДРда инсон ҳуқуқларининг тизимли равишда мунтазам ва кўп йиллик, катта кўламли ва қўпол бузилишлари қораланган”. 

Резолюция муаллифлари Шимолий Кореядаги инсон ҳуқуқлари билан боғлиқ вазиятни Халқаро жиноий судда кўриб чиқилишига чақиришган ва Шимолий Корея етакчисини жавобгарликка тортишни талаб қилишган.

Шу билан бирга ҳужжатда Корея уруши оқибатида ажралган оилалар масалалари бўйича Кореялараро келишувлар қутланган.