Абдураҳмон Ташановга қарши маъмурий иш судда тугатилди

Инсон ҳуқуқлари фаоли Абдураҳмон Ташановга нисбатан ёлғон ахборот тарқатиш айблови билан маъмурий иш қўзғатилган эди.

Ташановнинг Kun.uz'га маълум қилишича, маъмурий иш бугун, 1 апрел куни жиноят ишлари бўйича Миробод тумани судида кўриб чиқилиб, маъмурий ҳуқуқбузарлик ҳолати йўқлиги учун иш МЖтКнинг 271-моддаси 1-қисмига кўра тугатилган.

Ҳуқуқ фаоли аввалроқ Facebook ижтимоий тармоғида фуқаро Нозим Абдуллаевга нисбатан қийноқлар қўлланилгани ҳақида постлар ёзган.

“Бундан гўёки Давлат хавфсизлик хизматининг икки нафар мулозими жабр кўрдик, яъни бизнинг шаънимиз, қадр-қимматимиз камситилди, деган шикоят билан ҳарбий прокуратурага мурожаат қилган. Ҳарбий прокуратура маъмурий иш қўзғатган, бу иш суд томонидан рад қилинди”, – дейди Абдураҳмон Ташанов.