Украиналик генерал Меркелни Киевнинг НАТОга аъзо бўлиш бўйича режаларини барбод қилишда айблади

Украиналик генерал, мамлакат қуролли кучлари бош штаби бошлиғининг собиқ ўринбосари Игорь Романенко Германия канцлери Ангела Меркелни Киевнинг НАТОга аъзо бўлиш борасидаги режаларини барбод қилишда айблади.

Унинг сўзларига кўра, Киевга нисбатан коллектив хавфсизлик механизмини ишлатиш билан боғлиқ муаммолар бор. Романенконинг қайд этишича, агар ГФР етакчисининг сиёсати бўлмаганида Украинанинг НАТОга аъзо бўлиш истиқболлари бошқача бўлар эди.

«Биз интилмоқдамиз, лекин муносабат турлича бўлмоқда. Бизда 2008 йилда яқинлашиш учун энг катта имконият бўлган эди, лекин Путин фрау Меркель билан келишди ва афсуски Украина ва Гуржистон аъзолик бўйича ҳаракатлар режасини ололмаслиги учун барча ишни қилишди», — деган Романенко ZIK телеканали эфирида.

Украина Олий Радаси 2014 йилнинг декабрида икки қонунга ўзгартириш киритди ва давлатнинг блокларга аъзо бўлишдан холи статусини бекор қилди. Бундан ташқари, 2016 йилнинг июнида НАТОга аъзо бўлиш мамлакат ташқи сиёсатининг мақсади эканлигини ифодаловчи қўшимча ўзгартиришлар киритилди.

НАТОнинг собиқ бош котиби Андерс Фог Расмуссен Украина альянсга аъзо бўлиш учун бир қатор критерийларни амалга ошириши кераклиги ва бунинг учун жуда кўп вақт талаб қилинишини айтиб ўтган эди. Экспертларнинг фикрича, Киев яқин 20 йил ичида альянсга аъзо бўлиш учун даъвогарлик қила олмайди.