Қонунлар жамиятдаги муносабатларни тартибга солиш, фуқароларнинг ҳуқуқ ва бурчларини белгилаб бериш учун қабул қилинади. Қарангки, таълим жараёнига алоқадор қонунларда синф хонасидаги ҳароратга оид банд ҳам бор.
Адлия вазирлигининг «Ҳуқуқий ахборот» каналида бу борада ҳам маълумот берилди.
Унда шундай дейилади: «Қонунчиликка мувофиқ мактаблардаги иш хоналарида жумладан, синфлардаги ҳаво ҳарорати 16 °С дан паст бўлиши мумкин эмас.
Бунда, ҳарорат мунтазам равишда физика ўқув лаборатория хонасида 18 °С – 21 °С, спорт залида 18 °С – 20 °С бўлиши керак».
Болаларнинг соғлиги учун ғамхўрлик қиладиган, уларнинг сифатли таълим олишлари учун шароит яратадиган қонун-қоидаларнинг борлиги жуда яхши. Аммо бу қонунларга амал қилиняптими? Буниси энди катта савол.
Мисолларга эътибор беринг:
«Kun.uz» таҳририятига Самарқанд вилояти, Каттақўрғон тумани «Олмазор» маҳалласи Муртак қишлоғи аҳолисидан мурожаат келиб тушган, ўз вақтида мурожаатда кўрсатилган муаммолар жойида ўрганилганди. Янги ўқув йили арафасида мактаб филиали аянчли аҳволда эди. Мурожаатда кўрсатилганидек, ҳақиқатдан ҳам бирорта ўйингоҳ ёки спорт майдончалари йўқ. Иситиш тизими мавжуд эмас. Совуқ кунларда қўлбола печкаларда иситилади.
Шунингдек, Андижон туманидаги 44-мактабда хоналар совуқ, ўқувчиларнинг дарсга қатнашиш фоизи жуда пастлиги ҳақида сайтда «Андижоннинг «сирти ялтироқ, ичи қалтироқ» мактабида» сарлавҳали мақола эълон қилинган эди.
Қашқадарё вилояти Қамаши туманида мавжуд 89та умумтаълим мактабига 1312 тонна брикет нам ҳолатда етказиб берилган. Натижада мазкур ёқилғи маҳсулоти 200-300 кг кам чиқяпти. Бу ҳақда Turon24 мухбирига тумандаги 58-умумтаълим мактаби директорининг хўжалик ишлари бўйича ўринбосари Ҳамидулла Эргашев маълум қилган.
«Туманда мактабларнинг барчаси брикет ва кўмир билан иситилади, – деган туман халқ таълими бўлими мудири Шавкат Бекмирзаев. – Таълим муассасаларида мавжуд 502 та қозонхонанинг 11 таси мутлақо талабга жавоб бермайди. Ҳозир ушбу қозонхоналар қайта таъмирланмоқда».
Бағдод тумани «Конизар» қишлоғидаги 3-умумий ўрта таълим мактаби муаллимлари «Кўриб турганингиздек, ҳаво очиқ кунлари дарсни мана шу стадионда ўтамиз. Ёмғирли, қорли ва совуқ кунларда синф хонасида. Ўқувчиларимиз орасида спортнинг енгил атлетика, бокс, каратэ, стол тенниси турларига қизиқадиганлари жуда кўп. Лекин тўгарак ўтиш учун шароитнинг ўзи йўқ. Бизда ҳам вилоят, республика, Осиё чемпионлари бўлиши мумкин бўлган иқтидорли ўқувчилар бор. Ахир Бағдод азалдан полвонлар юрти. Ўқувчиларимиз атрофимиздаги 2-, 4-, 51-мактабдаги тенгдошларига ҳавас қилишади. Юртимизда ёш авлод тарбиясига, уни ҳар томонлама баркамол бўлиб улғайишига катта эътибор бериляпти. Бизни мактабга ҳам ислоҳотлар етиб келармикан? Муаммоларга жавоб излаб мурожаат қилмаган жойимиз қолмади. Ҳеч қандай самара йўқ», дейишганди.
«Вилоятларда аҳвол шунақада, аммо пойтахтдаги ўқувчиларнинг ошиғи олчи», деганлар адашишади. Яқинда пойтахтнинг Сергели туманидаги мактаблардан бирида иситиш тизими вақтида таъмирланмагани туфайли совуқ кунларда дарслар 30 дақиқадан давом этаётгани ҳақида хабар келиб тушди.
Начора, ислоҳотлар аста-секин самара бериб, амалдаги ишлар қонунчиликка мос келадиган кунлар ҳам келар...
Аброр Зоҳидов
