Kattaqo‘rg‘on tumanidagi Murtak qishlog‘i aholisi farzandlarini qaysi maktabda o‘qitadi?

Kun.uz tahririyatiga Samarqand viloyati, Kattaqo‘rg‘on tumani «Olmazor» mahallasi Murtak qishlog‘i aholisidan murojaat kelib tushdi.

«Qishlog‘imizda 53-maktab filiali joylashgan. Maktab filiali binolari va maktab jihozlari juda ayanchli ahvolda, o‘quvchilarni ta'lim olishi uchun umuman sharoit yo‘q. Ushbu holat yuzasidan tuman mutasaddi tashkilotlariga bir necha bor murajaat etdik. Muammoni hech kim hal qilib bermayapti. Sizlardan iltimos, shu masalani ijobiy hal etilishida amaliy yordam berishingizni so‘raymiz», – deyiladi murojaatnomada.

Murojaatda ko‘rsatilgan muammolarni joyida o‘rgandik. Yangi o‘quv yili arafasida maktab filiali haqiqatan ham ayanchli ahvolda.

Zarafshon daryosiga yaqin joylashgan ushbu qishloqdagi maktab filiali binosi 1990 yil maktabgacha ta'lim muassasasi sifatida qurilgan. Keyinchalik 53-umumiy o‘rta ta'lim maktabi filialiga aylantirilgan. Ayni vaqtda maktab filiali ta'mirtalab. O‘quvchilar uchun yangi  atigi 2 ta sinfxona ta'mirlangan. Ammo jihozlari juda eski holatda.

Qolgan xonalar tayyor emas.

Ayni vaqtda maktab filialida 32 nafar o‘quvchi 4-sinfgacha ta'lim oladi. Ikkita sinfxona 1-, 2-, 3-, 4-sinf o‘quvchilariga mo‘ljallangan. 1-, 3-sinflar uchun bitta sinfxonada, 2-, 4-sinflar uchun bir sinfxonada komplekt sinflar sifatida ta'lim beriladi. O‘z-o‘zidan ma'lumki, bu ta'lim sifatiga salbiy ta'sir ko‘rsatadi. Ushbu maktab filialida bor-yo‘g‘i 3 nafar o‘qituvchi bor.

Maktab filialida ichimlik suvi tarmog‘i ham yo‘q. Hojatxonalari antisanitar holatida.

Birorta o‘yingoh yoki sport maydonchalari yo‘q. Isitish tizimi mavjud emas. Sovuq kunlarda qo‘lbola pechkalarda isitiladi.

Maktab filiali o‘qituvchilari aytishicha, maktab ta'mirining ko‘p qismini ham o‘z oylik maoshlari hisobidan amalga oshirgan. Maktabda ta'lim oladigan o‘quvchilar ota-onalaridan maktab filiali ta'miri uchun 10 ming so‘mdan pul yig‘ib olingan.

– O‘z hisobimdan sinfxonalar ta'miri uchun 165 ming so‘m sarflashga majbur bo‘ldim, – deydi maktab filali o‘qituvchisi Muhayyo Saidova. – Boshqa o‘qituvchilar ham imkoniyatidan kelib chiqib, o‘z hisoblaridan mablag‘ sarflashlariga to‘g‘ri keldi.

Murtak qishlog‘ida 173 ta xo‘jalik bo‘lib, unda 900 dan ziyod aholi yashaydi. 200 ga yaqin maktabda ta'lim oladigan o‘quvchi yoshlar bor. Bu yoshlarning ayrimlari qishloqqa yaqin joylashgan 53- va 56-umumiy o‘rta ta'lim maktablarida ta'lim olishadi. Ammo qishloqqa ushbu ta'lim maskanlari 3–4 kilometr uzoqlikda.

56-umumiyo‘rta ta'lim maktabiga (qishloqdan 3 kilometr uzoqlikda) M-37 katta magistral yo‘lidan o‘tib boriladi. Yo‘lda piyodalar o‘tishi yo‘lagi yo‘qligi tufayli piyodalar bilan bog‘liq yo‘l-transport hodisalari ko‘p qayd etiladi.

– Olti nafar nevaram shu maktabda o‘qiydi, – deydi Murtak qishlog‘ida istiqomat qiluvchi Xolida Eshquvvatova. – Har kuni bolalarni eson-omon kelsin, deb xavotirda yashaymiz. Qishlog‘imizdagi maktabda sharoit yo‘q. Shu maktabni hech bo‘lmasa 9 yillik qilib berilsa, bu xavotirdan qutulgan bo‘lar edik.

53-umumiy o‘rta ta'lim maktabi qishloqdan 4 kilometr uzoqlikda. Bu maktabga qatnaydigan o‘quvchilar uchun qator muammolar tug‘diradi. Ayniqsa, qish kunlari muammolar yanada ko‘payadi.

– Biz ham farzandlarimiz, nevaralarimiz yaxshi sharoitda ta'lim olishini istaymiz, – deydi Oyzoda O‘roqova. – Ammo ahvolni ko‘rib turibsiz. Bu holatda qanday sifatli ta'lim olish mumkin?

Haqiqatan ham qishloq aholisining ko‘targan muammolari o‘rinli. Bu masala yuzasidan qishloq aholisi bir necha bor tuman mutasaddilariga murojaat qilgan. Ammo masala e'tiborsiz qolgan.

– Bu muammodan xabarim bor, – deydi Kattaqo‘rg‘on tumani Xalq ta'limi bo‘limi rahbari vazifasini bajaruvchi Toshmamat Otamurodov. – Lekin bu vazifaga tayinlanganimga endi bir hafta bo‘ldi. Masalani ijobiy hal etishga harakat qilamiz. Qishloqda yangi maktab qurilishini 2019 yil tuman dasturiga kiritish uchun taklif berdik.

53-umumiy o‘rta ta'lim maktabi direktori Sobira Umirova bilan ham mazkur holat yuzasidan suhbatlashdik.

– Qishloq aholisining e'tirozlari o‘rinli, – deydi S.Umirova. – Imkoniyat darajasida holatni yaxshilashga harakat qilyapmiz. Bu borada bir necha takliflar bilan tuman mutasaddilariga chiqqanman. Lekin masala ijobiy yechim topmagandan keyin mening ham imkoniyatim yo‘q. Axir o‘z hisobimdan qilishga imkoniyatim yo‘q-ku?! Shuning uchun men ham ilojsizman. Imkoniyat darajasida chora-tadbirlarni amalga oshirayapmiz.

Qishloq aholisi bilan suhbatlashganimizda o‘quvchilar ota-onalari bunday sharoitda farzandlarini maktabga bermasligini, shu masalada boshlari qotganligini, bu holatda qanday yo‘l tutishni bilmasliklarni aytishdi.

Ushbu masalaga Xalq ta'limi vazirligi va tuman mutasaddilari e'tibor qaratishini, muammoni ijobiy hal etishiga umid qilamiz. Axir, yangi o‘quv yili ham boshlanish arafasida. Ammo Murtak qishlog‘i aholisi bu masalada arosatda qolgan.

Biz bu mavzuga yana qaytamiz.

Bardoshbek Samad o‘g‘li,
Kun.uz muxbiri.