Франциядаги норозилик намойишларида 100 мингдан ортиқ киши иштирок этди, 130 киши ҳибсга олинди

Франция ички ишлар вазири Кристоф Кастанер шанба куни бўлиб ўтган намойишларда 100 мингдан ортиқ киши иштирок этганини маълум қилди, деб хабар берди BFMTV телеканали.

“Сариқ нимчалар” ҳаракати Францияда ёнилғи нархи оширилишига қарши норозилик намойишлари ўтказди.  

Кристоф Кастанер шунингдек, намойишлар вақтида 130 киши қўлга олинганини билдирди.

“Бугун кўплаб ҳибсга олишлар ўтказилди. Бутун Франция бўйича жами 130 киши қўлга олинди”, деди у.

Францияда 1 январдан бир литр бензин нархи 2,9 евроцентга, дизель нархи 6,5 евроцентга ошади. Europe1 радиостанциясининг маълумотига кўра, 2018 йил давомида дизель ёнилғиси нархи 23%, бензин нархи 15%га ошган.