CNN: G20 жаҳондаги бўлажак тартиб қандай бўлишини кўрсатиб беради

Жаҳондаги кўплаб «оғир вазнлилар» учрашадиган G-20 саммити, келажакдаги глобал тартиб ҳақида ўзига хос тасаввурга эга бўлиш имконини яратади. Бу ҳақда CNN телеканалининг халқаро сиёсат муҳаррири Ник Робертсон маълум қилмоқда.

Аргентинадаги саммит кун тартибида жаҳон сиёсатчилари бир-бирлари билан қатор учрашувлар сериясини ўтказадилар. АҚШ президенти Дональд Трамп билан турли учрашувлар, шубҳасиз, унинг «Америка биринчи ўринда» сиёсатига қаратилади. Бу, катта эҳтимол билан, «Катта йигирматалик» саммитининг муҳим якуний баённомасини тузиш учун барча имкониятлардан маҳрум этади, дея қўшимча қилади муаллиф. Робертсон аввалги G7 саммитини, шунингдек, Осиё-Тинч океани иқтисодий ҳамкорлик форумини мисол сифатида келтирган.

Трампнинг кўп қиррали ёндашувдан юз ўгириши «глобал драма»ни яратмоқда, дея ҳисоблайди муаллиф. Хусусан, АҚШ президенти Дональд Трамп ва Хитой етакчиси раҳбари Си Цзиньпин савдо урушининг кучайишига тайёр турибди. Бироқ, Трампдан фарқли ўлароқ, Хитой раҳбари, катта эҳтимол билан, бир неча йил олдинга режалар тузиб қўйган, деб ёзади Робертсон. Си Цзиньпин ҳокимият тепасида Трампдан кўра кўпроқ вақт қолади ҳамда Трампнинг президентлиги тарихга кирганидан кейин ҳам G20 саммитларида қатнашади. Муаллифнинг таъкидлашича, АҚШ ва Хитой етакчиларининг G20’даги учрашуви жаҳон савдосига жиддий таъсир кўрсатади.

Бундан ташқари, Қўшма Штатлар етакчиси Россия президенти Владимир Путин билан режалаштирилган учрашувни бекор қилди. Бу эса, ўз навбатида шуни англатадики, улар барча муҳим масалаларни муҳокама қила олмайдилар, дейилади материалда. Натижада, Россия етакчиси G20 саммитини Керч бўғозидаги ҳодиса туфайли Трампдан қандай ҳаракатлар кутиш кераклигига ишонч ҳосил қилмаган ҳолда тарк этади, дея қўшимча қилган CNN муаллифи.

Эслатиб ўтамиз, аввалроқ Кремль Трампнинг Путин билан учрашувни бекор қилиш ҳақидаги қарорига муносабат билдирганди.