Саёҳат қилишнинг энг ҳашаматли усули – кемадаги хонадонни сотиб олиш

Моддий жиҳатдан ўзига тўқ кўплаб инсонлар учун саёҳатлар ҳаётнинг одатий қисмига айланиб улгурди. Шундай экан, нима учун уларга ўзларининг ҳашаматли хонадонларида дунёнинг турли бурчакларига ташриф буюриш имкониятини тақдим этмаслик керак. “Утопия” саёҳат кемасини яратувчиларнинг асосий ғояси ана шундай. Унинг узунлиги деярли 300 метрга тенг, бортдаги хонадонларнинг ҳашамати, улуғворлиги қулайлигини таърифлашга тил ожиз. Сузиб юрувчи резиденцияларнинг нархи 4 миллион доллардан бошланиб, 36 миллион долларгача етади.

Уч йилдан ортиқ вақтдан сўнг кема саёҳатга отланади. У Уимбилдон, Риодаги карнавал ёки Олимпия ўйинлари каби дунёнинг йирик спорт ва маданий тадбирларига ташриф буюриши режалаштирилмоқда. Бундан ташқари, турли шаҳарларга ташриф давомида портда одатдагидек бир неча сутка эмас, бир неча ҳафта давомида қолади.

Лойиҳа яратувчиси Дэвид Робнинг фикрига кўра, «Утопия» - саёҳат қилишнинг энг ҳашаматли усули ва бу ердаги кўплаб хонадонлар аллақачон сотилган. Барчасига қўшимча тарзда, Дэвиднинг круиз кемасига ўхшаш кема бошқа йўқ. У 100 йил давомида хизмат қилиши мумкин.

Кемада майдони 139 дан 576 квадрат метргача бўлган 190 та хонадон мавжуд. Интерьер мода ва вақт ҳукмига бўйсунмайдиган классик ечимлар билан ҳашаматли қилиб ишланган. Дизайнерларнинг асосий вазифаси «Утопия»ни круиз лайнери кўринишида эмас, Марказий боғдаги ҳашаматли хонадонни эсга солувчи бўлиб гавдаланишига эришиш эди.

Бортда кўнгилочар машғулотлар ҳам бўлиши кўзда тутилган. Сузиб юрувчи резиденцияда яшовчилар театр, тунги клуб ёки казинога боришлари, гольф ва теннис ўйнашлари, жаз тинглашлари, ҳовузда сузишлари, спорт залига бориш ёки пиёдалар йўлакчасида сайр қилишлари мумкин. Круизни амалга ошириш истагида бўлган, бироқ бунинг учун катта апартаментларни харид қилишни хоҳламайдиганлар учун 160 хонадан иборат бутик-меҳмонхона фаолият юритади.