ОАВ: Россиянинг газ ташувчи кемаси Ўрта Ер денгизида ёнмоқда

Ўрта Ер денгизида суюлтирилган табиий газ (СТГ) ташиш учун мўлжалланган Россия кемаси — Arctic Metagaz ёнмоқда. Бу ҳақда Reuters агентлиги сешанба, 3 март куни денгиз ташуви ва денгиз хавфсизлиги соҳасидаги манбаларга таяниб хабар қилди.

Нашр суҳбатдошига кўра, газ ташувчи кемага Украина денгиз дрони ҳужум қилган бўлиши мумкин. Агентлик маълумотига кўра, ҳозирча кема экипажининг тақдири номаълум. Шу билан бирга, The Times of Malta газетаси экипаж қутқарилгани ва ҳудуддаги бошқа кемага ўтказилганини ёзмоқда.

Reuters қайд этишича, Arctic Metagaz сўнгги бор 2 март кечқурун Малта соҳиллари яқинида сигнал берган. Грециянинг “Нафтемборики” газетаси ёзишича, ёнғин 3 март куни маҳаллий вақт билан тахминан соат 4:00 атрофида (Тошкент вақти билан 7:00) бошланган — ўша пайтда кема Ливия соҳиллари яқинида бўлган ва эҳтимол дронлар томонидан ҳужумга учраган. Нашр, шунингдек, ҳужумни Украина ташкил этган бўлиши мумкинлигини айтган, аммо бунинг учун ҳеч қандай далил келтирмаган.

Ёнғин фактини gCaptain порталига денгиз хавфсизлиги ва рискларни бошқаришга ихтисослашган Diaplous Group грек компанияси вакили ҳам тасдиқлаган.

Arctic Metagaz кемаси — Россиянинг “Арктик СПГ-2” терминалидан санкциялар остидаги СТГни Хитой жанубий соҳилидаги Бэйхай портига ташишда қўлланадиган тахминан ўнта газ ташувчи кемадан бири. gCaptain маълумотича, 2026 йил 24 феврал куни Arctic Metagaz юк ортганидан кейин Мурманск портларидан чиқиб кетган ва эҳтимол Мисрнинг Сувайш порти томон йўл олган. 2024 йилдан бери кема АҚШ ва Буюк Британия санкциялари остида.