Фазога Ойнинг қоронғи томонини тадқиқ қилувчи илк қурилма учирилди

Хитой 8 декабрда Ернинг табиий йўлдоши – Ойнинг қоронғи томонини тадқиқ қилувчи илк зондни фазога учирди. Қурилма Хитой дастурининг навбатдаги қадами бўлган.

“Chang'e-4 номли зонд Ойнинг Жанубий қутбида қўниши керак. Аввалроқ коинот қурилмалари Ойнинг қоронғи томонини кўздан кечирган, бироқ унга қўнмаган. Зонд панорамали камера ва ўлчаш асбоблари билан жиҳозланган”, дейилган хабарда.

Таъкидланишича, Хитой коинотни забт этиш борасида катта режаларга эга бўлиб, 2020 йилда Ойга луноход жўнатмоқчи, 2022 йилгача эса ўз коинот станцияларини қурмоқчи. Хитой, шунингдек, 2029 йилгача Юпитерга тадқиқот миссиясини жўнатишни режалаштирган.