Трамп штаби Россиянинг сайловларга аралашуви ҳақидаги даъвони бекор қилишни сўради

АҚШ президенти Дональд Трампнинг сайловолди штаби адвокатлари суддан демократик партиянинг Россиянинг сайловларга аралашуви иши бўйича Трамп, Россия, WikiLeaks ва бошқа жавобгарларга нисбатан даъвосини бекор қилиш борасида оғзаки муҳокама белгилашни талаб қилмоқда.

Аввалроқ бошқа жавобгарлар, жумладан WikiLeaks бу даъво ҳуқуқий жиҳатдан нотўғрилигини билдириб, уни бекор қилишни талаб қилганди. Россия Америка суди юрисдикциясини тан олмаслигини билдирган ва суд жараёнида қатнашмаслигини маълум қилганди.  

Апрель ойида АҚШ демократик партиясининг миллий қўмитаси Россия ҳукумати, Россия қуролли кучлари бош штаби бош бошқармаси (ГРУ), ота-бола тадбиркорлар Агаларовлар, WikiLeaks асосчиси Жулиан Ассанж, Дональд Трампнинг сайловолди штаби, президентнинг куёви Жаред Кушнерни судга берганди. Даъвода 2015 ва 2016 йиллардаги хакерлик ҳужумлари демократларга зарар етказиш ҳамда Трамп номзодини илгари суриш мақсадида амалга оширилгани айтилган.