АҚШ ва Канада бўйлаб портлашлар тайёрланаётгани ҳақида хабарлар тарқатилди

АҚШ ҳукумати турли муассасаларга портлатиш билан таҳдид қилинган юзлаб хатлар бўйича суриштирув ишларини бошлади. 

Сан-Франциско полициясининг хабар беришича, бундай хатлар ҳақидаги мурожаатлар эрталаб соат ўндан келиб туша бошлаган.

Калифорнияда ана шундай хабар сабабли Infinity Ward компанияси офиси эвакуация қилинган.

Худди шундай таҳдидли мактублар Канадада ҳам пайдо бўлган. Мактублар Виннипег, Монреаль, Оттава, Калгари, Торонто, Ванкувер ва Пентиктон шаҳарларидаги муассасаларга жўнатилган, деб хабар берди ABCNews Канаданинг CTVNews агентлигига таяниб.  

Портлатилиши айтилган муассасалар сифатида кутубхоналар, банклар ва шифохоналар тилга олинган. Нью-Йорк полиция департаментининг билдиришича, бутун мамлакат бўйлаб юзлаб корхоналар, мактаб, шифохона ва бошқа муассасаларга таҳдидли мактублар жўнатилган.  

TheVerge нашрининг хабар беришича, мактубларда бир нечта биткоин-ҳамёнлар кўрсатилган. Ушбу ҳолат юзасидан ҳозирча ҳеч ким ҳибсга олинмаган.