«Микрокредитбанк» Чилонзор туманида «Тараққиёт» номли янги мини-банкини очди

Пойтахтимизнинг Чилонзор туманидаги «Қатортол» савдо мажмуасида «Микрокредитбанк» акциядорлик тижорат банки Амалиёт бошқармасига қарашли «Тараққиёт» номли янги мини-банк иш бошлади.

Мазкур мини-банкнинг очилиш маросимида турли давлат ва жамоат ташкилотлари ходимлари, банк мижозлари бўлган етакчи тадбиркорлар ва аҳоли вакиллари иштирок этди.Малакали мутахассислар томонидан мижозларга барча турдаги банк хизматлари кўрсатиладиган мазкур мини-банк замонавий жиҳозлар, шинам ва ёруғ хоналар ҳамда узлуксиз хизмат кўрсатувчи банкоматлар билан таъминланган.

Мазкур мини-банкда мижозлар ортиқча оворагарчиликларсиз ҳисобрақам очиш, омонат қўйиш, кредит олиш, барча турдаги тўловларни амалга ошириш, банкомат орқали миллий ва халқаро пластик карталардаги маблағларни нақдлаштириш, халқаро валютани сўмга айирбошлаш, пул ўтказмаларини амалга ошириш имкониятлари яратилган.

Мини-банкнинг тантанали очилиш маросимида банк бошқарув раиси ўринбосари Азиз Низамов сўзга чиқиб,мамлакатимиз иқтисодиёти ривожида молия муассасаларининг ўрни долзарблигини ҳамда мазкур мини-банк мисолида банк томонидан шакллантириладиган хизмат кўрсатиш марказлари аҳоли ва тадбиркорлик субъектларининг банк хизматларига бўлган эҳтиёжларини қулай, тез ва замонавий технологиялар асосида қондиришини алоҳида таъкидлаб ўтди.

Бу каби мини-банкларни очиш орқали банк хизматларини бевосита истеъмолчилар учун қулай бўлган ҳудудларга етказиб бериш – банк раҳбариятининг келгуси даврларда амалга ошириши режалаштирилган бош мақсадларидан биридир.