Канадалик элчи Huawei бош директори ёнини олгани учун лавозимидан маҳрум бўлди

Канаданинг Хитойдаги элчиси Жон Маккаллум Huawei компанияси бош директори Мэн Ваньчжоунинг АҚШ сўрови бўйича Ванкуверда ҳибсга олинганига изоҳ бергандан кейин лавозимидан бўшади. Бу ҳақда The Guardian нашри хабар берди. 

Канада бош вазири Жастин Трюдо Маккаллумнинг истеъфосини қабул қилган, бироқ бу қарорга нима олиб келганига аниқлик киритмаган. Трюдонинг таъкидлашича, унда ходимларни ўзгартириш режаси бўлмаган.

Ваньчжоу АҚШнинг Эронга қарши санкцияларини бузганликда айбланган. 

25 январда Маккаллум Ваньчжоу ишида барча исботлар Huawei директори томонда эканлигини айтган. У Вашингтоннинг Ваньчжоуга билдирилган айбловларида кўплаб хатоликлар борлигини таъкидлаб ўтган. Жумладан, гап ишга АҚШ президенти Дональд Трампнинг сиёсий аралашуви, Канаданинг АҚШнинг Эронга қарши санкцияларига қўшилмагани ҳақида борган.   

“Мен янглиш гапирдим. Менинг сўзларим бу масала бўйича фикримни аниқ ифодаламайди. Ҳукуматда аввал айтилганидек, ишда сиёсий сабаб йўқ”, деб айтган Маккаллум кейинроқ. 

Ваньчжоу ҳибсга олингандан кейин Хитойда Канаданинг бир неча фуқароси ҳибсга олинган, яна бир канадалик ўлим жазосига ҳукм қилинган.