АҚШнинг қароридан сўнг Путин «Калибр» ракетасини такомиллаштириш таклифини маъқуллади

Россия Президенти Владимир Путин мудофаа вазири Сергей Шойгунинг гипертовушли «Калибр» ракеталарининг қуруқлик учун мўлжалланган вариантини ишлаб чиқиш таклифини маъқуллади. Бу ҳақда Кремль матбуот хизмати хабар берди.

«Улар [АҚШ] илмий-тадқиқот ва тажриба-конструкторлик ишлари билан шуғулланишаётганини эълон қилишди, биз ҳам худди шу ишлар билан шуғулланамиз», — деди Путин.

Ҳозирда Россиянинг «Калибр» қанотли ракетаси фақатгина денгиздан учириладиган вариантда ишлаб чиқарилмоқда. Ракеталар янги фрегатлар ва ракета кемаларигагина ўрнатилган. Бу Ўрта ва кичик масофаларга мўлжалланган ракеталарни йўқ қилиш тўғрисидаги шартномада кўзда тутилган чеклов билан боғлиқ бўлиб, унга кўра, бундай ракеталар қуруқликда ўрнатилиши тақиқланади.

2 февралдан АҚШ ушбу шартномадан чиқади ва 1987 йилда зиммасига олган мажбуриятларни бажаришни тўхтатиб туради. Шунингдек, Россия Президенти Владимир Путин ҳам РФ Ўрта ва кичик масофадаги ракеталарни йўқ қилиш тўғрисидаги битимда иштирок этишни тўхтатиши ҳақида маълум қилди.