Сербия ТИВ ватерполочиларга ҳужум қилингани сабабли Хорватия элчихонасига нота йўллади

Сербия ташқи ишлар вазирлиги Сплит шаҳрида "Црвена Звезда" ватерпол клуби ўйинчиларига ҳужум қилингани муносабати билан Хорватия элчихонасига дипломатик нота йўллади. Бу ҳақда Сербия ташқи ишлар вазирлиги маълум қилди.

"Сербия ташқи ишлар вазирлиги Хорватия Республикаси элчихонасига норозилик нотаси йўллади", - дейилади хабарда.

Вазирлик шунингдек, воқеадан "чуқур ташвиш"да эканлигини билдирган.

Slobodna Dalmacija порталининг хабар беришича, "Црвена Звезда"нинг уч ўйинчиси Сплит шаҳрида маҳаллий "Морнар" жамоаси билан ўйин олдидан қаҳвахонада ҳужумга учраган. Спортчилар ўз клублари либосида бўлган ва қаҳвахона официантининг ғазабига учрашган. Улар қаҳвахонадан чиқиб кетмоқчи бўлишганида бир гуруҳ кишилар ватерполочиларни арматура ва тўқмоқлар билан савалашган.

Натижада ўйин бекор қилинган.