Ҳиндистон Покистондан асирга олинган учувчини озод этишни талаб қилди

Фото: AFP 2019 / Stringer

Нью-Деҳли Исломободдан 27 февралдаги можаро вақтида асирга олинган учувчини озод этишни талаб қилди. Бу ҳақда Ҳиндистон ташқи ишлар вазирлиги хабарида айтилган.

“Покистон ҳибсга олинган ҳинд ҳарбийсига бирор зарар етказмаслиги борасида ўзига ҳисобот бериши керак”,-дейилган хабарда.

Ҳиндистон 27 февралда Покистонга қарашли қирувчи самолётни, Покистон эса иккита ҳинд қирувчи самолётини уриб туширганини маълум қилган. Покистон томонининг таъкидлашича, уриб туширилган самолётлардан бирининг учувчиси асирга олинган. Кейинроқ Покистон ОАВ ҳинд учувчиларидан бири видеосини эълон қилган. Яраланган учувчи журналистларга ўз исми ва ҳарбий унвонини маълум қилган.

Ҳиндистоннинг версияси бўйича, Кашмир устида Покистон ҳарбий-ҳаво кучларининг қирувчи самолёти уриб туширилган. Ҳиндистон ушбу ҳаво жангида МиГ-21 самолётини йўқотган, унинг учувчисини эса бедарак йўқолган деб ҳисобламоқда.

Тайёрлаган Шуҳрат Раҳимов

#Ҳиндистон #Покистон

14 февраль куни Покистон ҳудудида ўрнашган «Жайш-э-Муҳаммад» террорчи гуруҳи Кашмирда Ҳиндистон армияси ҳарбийлари колоннаси ўтаётган йўлда теракт содир этиши натижасида 46 нафар ҳинд ҳарбийси ҳалок бўлди. Бу воқеа ортидан Покистон ва Ҳиндистон муносабатларида можаро яна авж олди.