Женевада 89-халқаро автосалон ўз ишини бошлади

5 март куни Женевада 89-халқаро автосалон ўз ишини бошлади. Унда бир қатор йирик автомобилсозлик компаниялари янги моделларини тақдим қилди. Жумладан, автосалонда оммага охирги ойларда анонс қилинган моделлар, жумладан, Ferrari F8 Tributo, Skoda Kamiq, Peugeot 208, Bentley Bentayga Speed ва Renault Clio тақдим қилинмоқда. 5 ва 6 март кунлари салонга фақат журналистлар ташриф буюради, 7 мартдан эса барча учун очиқ бўлади.

Автосалонда тақдим қилинаётган моделлардан аҳамиятга моликларидан бири Bugatti La Voiture Noire бўлиб, у Chiron модели негизида марканинг 110 йиллик юбилейи шарафига яратилган. У ягона нусхада яратилган бўлиб, нархи 11 млн еврони ташкил қилади. Маълум қилинишича, машина Bugatti коллекционерларидан бирига сотиб бўлинган.   

Машина 8 литрли W16 двигател билан жиҳозланган. Унинг қуввати 1500 от кучини ташкил қилиши айтилган, 100 км/соат тезликка 2 сониядан сал кўпроқ вақтда эришади.

Оммада катта қизиқиш уйғотган яна бир машина Volkswagen томонидан тақдим қилинган электр пляж баггиси бўлди. ID Buggy номли концепт-кар 204 от кучига эга электромотор билан жиҳозланган. Бу модел бир қувватланишда 250 км йўл боса олади.

Женевада Skoda маркаси ҳам ўзининг электр концепт-карини тақдим қилди. Гап Vision iV кроссовери ҳақида кетмоқда. Бу автомобил умумий қуввати 306 от кучини ташкил қиладиган 2 та электромотор олган. У бир қувватланишда 500 км йўл боса олади. Машинанинг серияли версияси 2021 йилда чиқарилиши тахмин қилинмоқда.

Автосалонда тақдим қилинган электромобиллар рўйхатини Audi Q4 e-tron давом эттирмоқда. Бу яна битта концепт-кар бўлиб, кейинги йилданоқ серияли чиқарилиши мумкин. Ушбу машина ҳам MEB платформаси негизида қурилган бўлиб, умумий қуввати 300 от кучидан кўпроқни ташкил қилувчи иккита электромотор билан жиҳозланган. У бир қувватланишда 450 км йўл боса олар экан.

Mercedes-Benz Женевага 8 ўриндиқли EQV электр минивэнини келтирган. Унинг серияли ишлаб чиқарилувчи версияси 2021 йилдан сотувга чиқарилади. Унинг 201 от кучига эга ягона электромотори олд ўқида жойлашган бўлиб, минивэнни соатига 160 км/соатгача тезлаштириши мумкин. Машина бир қувватланишда 400 км йўл боса олади.

Автосалон 17 мартгача давом этади.