“10 кунда 3 марта бузилди” – Тошкентда янги олинган BYD Seal 6 харидори ва уни сотган автосалон ўртасида низо чиқди

Зуҳра Тожиева 27 феврал куни Тошкент шаҳри Навоий 35 манзилида жойлашган BYD Megawatt автосалонидан BYD Seal 6 машинасини сотиб олган. 30 фоиз бошланғич тўлов (96 млн сўм), 16 млн сўм суғуртага тўлаган.

“1 апрелдан машинага кредит чиқяпти, уни ойма-ой тўлашим керак. Машина 2 март куни бузилиб қолди, кейин уни BYD сервис марказига олиб бордим, тузатиб беришди. 3-4 кундан кейин яна бузилди, яна бордим, тузатишди, олиб келдим. 8 март куни машина 3-марта, тоғга кетаётганимда йўлда бузилиб қолди. “1 дақиқада машинадан тушинг. Блок бўлади”, деган ёзув чиқди.

Автосалонга қайта-қайта бордим, илтимос машинамни алмаштириб беринглар, деб сўрадим. Лекин улар алмаштириб беришга рози бўлмади, ўзини тузатиб берамиз дейишди. Сервисдаги усталар “ўзимиз ҳам тушунмаяпмиз, бу машинага нима бўлганини”, деяпти. 4 кундан бери на машинам уларда. Машинага номер олиш керак 10 кун ичида, машина устада ётибди. Хуллас, ҳам вақтим, ҳам пулим кетяпти, эрта-индин ҳал қилиб берамиз деб чўзиб юришибди. Бизда сотувда машинанинг “запчаст”и йўқ, Хитойдан келади деб юришибди. “Биз сиз билан келишувда фақат машинани тузатиб беришга гаплашганмиз, ҳеч қанақа машина алмаштириб бермаймиз”, дейишяпти. Менга бу модел керак эмас, олмайман буни, дедим. Мен шу машина сабаб 11 млн сўм харажатга қолиб кетдим, 10 кун ишга бора олмадим, болаларим касал бўлди. Машина бузилиб қолганда эвакуаторга 1 млнга яқин пул тўладим. Агар компания зарарни қоплаб берса, бошқа қимматроқ модел учун устига пул тўлашга тайёрман”, – дейди мурожаатчи.

Kun.uz ҳолатни аниқлаштириш учун Зуҳра Тожиевага машина сотган автосалон менежери Нодир Тулиев билан боғланди.

“Харидорга машинани мен сотганман, шу моделга уни ўзим қизиқтирганман. Ўзлари хоҳлаб шу машинани олганлар. Уни тест қилганимизда ҳеч қанақа дефект чиқмаган. Шу сабабли бемалол сотаверганман. Бу масала деярли ҳал бўлиб бўлди: харидорга машинани алмаштириб берамиз, банк билан келишув олиб боряпман. Ўзлари хоҳлайдиган моделга алмаштириб берамиз”, – деди у.

Автосалон менежери харидорга компенсация тўлаш масаласига аниқлик кирита олмаслигини маълум қилди. “Буни юридик бўлим ҳал қилади”, – деди у.

Компаниянинг мижозлар хизмати бўлими раҳбари Анна Брюзгинанинг қўшимча қилишича ушбу автомобил ҳолатида жиддий камчиликлар аниқланмагани ҳозирча  тасдиқланмаган.

5 март куни мижознинг шикояти қабул қилинган ва кафолат ҳолати сифатида рўйхатга олинган. 6 март куни эса кафолат доирасида вентилятор алмаштирилган.

8 март куни мижоз автомобилни тунги вақтда қўриқхонада қабул-топшириш далолатномасисиз ва ишончномасиз қолдирган.

Мижоз билан мулоқот давомида автомобилни алмаштириш бўйича ҳеч қандай ваъда берилмаган.  

Мижознинг талабларига жавобан компания вакиллари бу масала алоҳида тартибда кўриб чиқилишини, чунки автомобилни алмаштириш учун қонунчиликда белгиланган алоҳида тартиб мавжудлигини билдиришган.

Мумкин бўлган носозликни тасдиқлаш ёки рад этиш учун ҳозирда диагностика ишлари олиб борилмоқда. У якунлангач, расмий жавоб тақдим этилади.

Барча ҳаракатлар шартнома ва кафолат мажбуриятлари доирасида амалга оширилмоқда, дейди Анна Брюзгина.

BYD Seal 6 бу — Хитойнинг BYD компанияси ишлаб чиқарган гибрид (бензин + электр) седан бўлиб, тежамкорлиги билан танилган. Модел 2025 йил октябрида Ўзбекистон бозори учун тақдим этилган ва расмий савдоси бошланган. Хитой бозорида BYD Qin L номи билан сотиладиган бу модел Ўзбекистон бозорида фақат битта комплектацияда сотувга чиқарилган ва унинг нархи 364,4 млн сўм этиб белгиланган.