Зангиотада уч кишини ўлдирган шахс Зоминда қўлга олинди

Тошкент вилоятининг Зангиота туманида турмуш ўртоғи ва икки нафар ўгай фарзандини ўлдиришда гумон қилинган шахс Зомин туманида қўлга олинди. Бу ҳақда бош прокуратура матбуот хизмати хабар бермоқда.

«2019 йил 17 март куни Тошкент вилояти, Зангиота тумани, Хушрўй кўчаси, 13-уйда яшаган Н.А. (аёл киши, 1972 йилда туғилган) ва унинг биринчи турмушидан бўлган фарзандлари Ҳ.Н. (1994 йил) ва Ш.Н. (1995 йил)ларнинг мурдалари кўкрак қафаси, ўпка ва юракка санчилиб кирган оғир тан жароҳатлари билан топилган.

Воқеа жойига тезкор тергов гуруҳи етиб борган ҳамда кечиктириб бўлмайдиган тергов ҳаракатлари ўтказилиб, суд-тиббиёт экспертизаси тайинланган.

Ҳодиса содир бўлган жойни кўздан кечириш давомида хонадонга ўрнатилган кузатув камерасининг хотира қурилмаси (hard disc) ашёвий далил тариқасида олиниб, ундаги видео тасвирлар кўздан кечирилганида, ушбу қотиллик жинояти Н.А.нинг шаърий никоҳдаги турмуш ўртоғи И.Х. томонидан содир этилгани аниқланган.

Мазкур жиноят иши юзасидан Жиззах вилояти прокуратураси ва вилоят ИИБ ходимлари билан ҳамкорликда гумон қилинувчи И.Х. Зомин туманида қўлга олинган», дейилган хабарда.

И.Х.га нисбатан Ўзбекистон Республикаси Жиноят кодексининг 97-моддаси 2-қисми «а» ва «ж» бандлари билан жиноят иши қўзғатилган, дастлабки тергов ҳаракатлари олиб борилмоқда.

Терговнинг бориши устидан Бош прокуратура томонидан алоҳида назорат ўрнатилди.