Шимолий Корея етакчиси санкцияларга зарбалар билан жавоб беришга чақирди

Фото: EPA

Шимолий Корея етакчиси Ким Чен Ин мамлакатга таъсир қилиш учун санкциялар қўллаётганларга зарбалар беришга чақирди. Жанубий Кореянинг Yonhap ахборот агентлиги хабар беришича, Ким Чен Ин бундай баёнотни Пхеньянда 10 апрелда ўтган Корея меҳнат партияси марказий қўмитаси сессиясида берган.

“Биз ривожланаётган социалистик иқтисодиёт байроғини изчил кўтариб, бизни санкциялар билан тиз чўктира оламан деб хато ўйлаётганларга зарбалар беришимиз лозим”, деб айтган Ким Чен Ин.

Унинг таъкидлашича, санкциялар солиниши “Шимолий Корея ҳукумати томонидан ўз кучларига таяниб сиёсат юритаётганининг тўғрилигини исботлайди”, бундай сиёсатда миллий иқтисодиёт ўз технологиялари ва захираларига таяниши ҳамда мустақил бўлиши керак.

Yonhap’нинг таъкидлашича, Ким Чен Ин бу ҳақда АҚШ ва Жанубий Корея президентларининг Вашингтондаги учрашуви арафасида айтиб ўтди. 11 апрелда ўтадиган учрашувда томонлар Шимолий Корея ядро масаласини ҳал қилиш йўлларини муҳокама қилишлари кутилмоқда.

Тайёрлаган: Шуҳрат Раҳимов

#Шимолий Корея #санкциялар